¹ Bulya Kristu alibusire omu mubiri gwage, ninyu mucîseze okuyorha omu murhima gwinyu ntyo, bulya owamâlembera amalumwa g'omubiri, oyo akola ahimire ebyaha. ² Kurhebga buno, mulame ensiku zicimusigalire omu bulamu bwinyu en'igulu nk'oku Nnâmahanga alonzize, c'arhali kulama omu nyifinjo z'omubiri. ³ Bulya mwalamire nsiku nyinji omu kukâjira ebijiro by'abapagani. Mwalamire omu by'enshonyi, omu nyifinjo mbi, omu ndalwe n'omu kulîra obudambye, omu kunywa buzira lugero n'omu kugashaniza ensalamu zishahusire. ⁴ Na buno abapagani bakola basômirwe okwenge murhacicîshwekîri kuli bo omu kukâjira birya bijiro bibozire mwakag'ijira bwenene, banakola bali bamujacira. ⁵ Cikwone ebyo bijiro byabo byoshi banabidôsibwe embere za Nnâmahanga, ye cirheganyize okutwira abazine n'abafire emanja. ⁶ Okwo kwo kwarhumaga abafîre nabo bayigirizibwa Emyanzi y'Akalembe, mpu lyo abayazire omu lubanja lw'omubiri omu masu g'abantu, babona obuzine bw'omûka embere za Nnâmahanga. ⁷ Obuzinda bw'ebintu byoshi bukola buli hofi. Mube n'obumanye, munabe ba kulanga olugero, lyo muhasha okushenga Nnâmahanga. ⁸ Ci bwenene muzigirane mwene na nene bwenene, bulya obuzigire buzâza byaha binji. ⁹ Mukâyegerezanya omu mwa binywe buzira kucîduduma. ¹⁰ Mâshi ngasi muguma muli mwe arhabale ababo nk'oku agabîrwe enshokano, kulya kukwanine abalanzi binja b'engalo ya Nnâmahanga ya ngasi lubero. ¹¹ Ow'okuyigiriza agwasirwe ayigirize abandi emyanzi ya Nnâmahanga. Ow'okukala agwasirwe akole n'emisi Nnâmahanga amuhîre, lyo Nnâmahanga akuzibwa muli ngasi kantu erhi Yezu Kristu orhuma. Ye gwerhe irenge n'obuhashe ensiku n'amango! bibe ntyo. ¹² Bîra bani mumanye mwasômerwa n'amarhangulo madarhi gamugwarha; murhabâga nka kula bwo burhanzi mwabona okwo. ¹³ Mube kushagaluka mushagaluka erhi kwo, bulya mugwerhe ecigabi oku malibuko ga Kristu, lyo mushagaluka bwenene hano irenge lyage liyalagala. ¹⁴ Mucîshinge nka bankamujacira mpu kwenge muli baganda ba Kristu, bulya Omûka Mwimana, Omûka gw'obukuze, gumuli mwo. ¹⁵ Muli mwe irondo harhajiraga owalibuzibwa nka mwisi wa bantu, cisi erhi nka cishambo, erhi nka nyakola-mabi, erhi nka ndyalya. ¹⁶ Cikwone erhi hankajira owalibuzibwa mpu kwenge ali mukristu, mâshi arhagwa n'enshonyi z'okwo, abe Nnâmahanga ye avuga omunkwa kulya kuba amuhîre obuhashe bw'okuhêka izino lya Kristu. ¹⁷ Amango gahisirage, go mango g'Okutwa Emanja. okwo kukolaga kurhondire, na lubaga lwa Nnâmahanga lwo lwarhang'itwirwa olubanja. Erhi ankaba rhwe okutwwa emanja kwarhangirira kwo, kurhi kwahwa mwo hano kurhongera balya balahîre okuyemera Emyanzi ya Nnâmahanga y'Akalembe? ¹⁸ Nk'oku Amandiko gadesire mpu: "Erhi ankaba abantu b'emirhima minja Bankacizibwa oku kutwa entubano, Kurhigi byaba oku bantu babi n'abanyabyaha bohe?" ¹⁹ Co cirhumire abali balibuka erhi oku Nnâmahanga alonzize kurhumire, bagwasirwe bagendere ukujira aminja n'okulangalira Lulema. Mwikubagirwa.