¹ Ninyu kwo n'okwo mwe bakazi mugombe kuli baballo, bulya erhi kwankaba hali baguma ba muli bo barhayemiri akanwa ka Nnâmahanga, rhubahise oku bwemere erhi bijiro binyu birhuma. Murhacîfinje okuderha akanwa, ² bulya balola kurhi ebijiro binyu birhali kwo ishembo n'eby'okukengana biyosire. ³ Okulimba kwinyu kurhabâga kw'embuga y'omubiri, nk'okuhungwa emviri, nk'okuyambala ebisikiyo by'ennoro, n'okulimbira emyambalo minjinja. ⁴ Cikwone okulimba kwinyu kube kw'omuntu winyu w'omu ndalâla. kube kulimba kwinja kulya kurhankasherera, kube kw'omu murhima mutûdu na gwa murhûla, kube kwa kamalo kanene emalanga ga Nnâmahanga. ⁵ Ntyo kwo abakazi ba mîra bakag'ilimba; bakag'iyumva bîba erhi banalangalire Nnâmahanga. ⁶ Ntyo kwo naye Sara ayorhaga. Akag'iyumva iba Abrahamu, akâmuderha mpu "Nnawabo". Buno mukolaga muli bâli erhi mwankajira aminja, n'erhi mwankaleka mpu akantu koshi koshi kurhamuyobohagya. ⁷ Ninyu kwo n'okwo, mwe balume, mulame haguma na bakinywe erhi munamanyirire oku biba biremwa bizamba. Mubakenge nabo, bulya bayish'iyima haguma akinyu omu nshokano y'obuzine. Erhi mwankajira ntyo, ntaco cankacihanza omusengero gwinyu okuyumvîbwa. ⁸ Mweshi mube na ngerêrezo nguma mukabêrana lukogo. Muzigirane nka bana ba nda nguma, mube ba bwonjo na birhôhye. ⁹ Murhagalugalulaga obubi oku bundi, erhi cijaci oku cindi. Cikwone oku mwayorha erhi kwo, mukâshuza omu kuhâna obwanga, bulya ninyu Nnâmahanga amulanganyize oku amuha obwanga amango amuhamagalaga. ¹⁰ Bulya Amandiko gadesire mpu: "Ngasi olonzize okusîma aminja, N'okubona ensiku z'omurhûla, Agwasirwe alange olulimi lwage okuderha kubi, N'akanwa kage karharhengaga mwo nderho za bulyalya, ¹¹ Agwasirwe aleke amabi, ajire aminja, Agwasirwe alongereze omurhûla, anagukulikire. ¹² Bulya amasu ga Nyakasane ganalolereze abashinganyanya Anayumvêrheze nôkushenga kwabo. Cikwone anayerekeze abijira amabi omugongo." ¹³ Nndi wamujira kubi erhi ankaba muli bashibirizi omu kujira aminja? ¹⁴ Erhi mwankalibizibwa okwenge mujijire ebishinganine, munacîshinge. Murharhemukaga abantu ciru n'ehitya, murharhemukaga. ¹⁵ Cikwone muhe Kristu olukengwa omu mirhima yinyu, mumubone nka Nyakasane. Ngasi mango mube mucîrheganyize okushusha ngasi bakamudôsa mpu mubahugûlire igwarhiro ly'obulangalire mugwerhe. ¹⁶ Cikwone mujire ntyo n'obutûdu haguma n'obukenge mube n'entimanya nyinja, lyo amango bamushobeka, balya bantu baderhera ebijiro binyu kubi enshonyi zibagwarhe erhi myanzi yabo erhuma. Ebyo bijiro binyu Kristu ye bikubmula. ¹⁷ Bulya ah'omuntu ankalibuka mpu kwenge anajijire amabi, ankalibuka mpu kwenge anajijire aminja erhi okwo kwo Nnâmahanga alonzize. ¹⁸ Ntyo kwo Kristu naye afîre liguma na liguma oku byaha by'abantu; omweru kweru afîra abanyabyaha, mpu arhuhise kuli Nnâmahanga; bulya ayisirwe omu mubiri, cikwone ayish'ifûlwa buzinda na Mûka gwa Nnâmahanga. ¹⁹ Oyo Mûka ye wamuhîre emisi y'okugend'iyiriza abashweke, ²⁰ kwo kuderha oku galya maroho ga balya bantu ba mîra okuyemera oku Nnâmahanga âli desire, amango abwonjo bwa Nnâmahanga bwakag'ilinda mwa zirya nsiku Nowa ayubaka amashuwa. Mw'ago mashuwa mwaja bantu basungunu bone, gwâli munani gone bacirire mw'ago mîshi. ²¹ Ago mîshi lwâli lwiganyo lw'obubatizo bumuciza, arhali kurhenza izinga ly'omubiri, ci omu kushenga Nnâmahanga n'omurhima gucîre, obufûke bwa Yezu Kristu burhumire, ²² ye wajîre emwa Nnâmahanga( na buno akola ali ekulyo kwa Nnâmahanga, aho ho arhambulire bamalahika*, n'amami, n'agandi mahashe goshi.