¹ Pavuli pomwalira Ehudi, banthu ba Israeli bewelezyapo soti kuchita viipa pamenso pa Yehova. ² Yehova ebagulisa mu manja ya Yabini mfumu ya Kenani enzolamulira mu Hazon. Mkuru wa nkhondo ila enze Sesira, ndipo enzonkhala mu Haroseth Hagoyim. ³ Banthu ba Aisraeli belilila kwa Yehova kuti abathandize chifukwa Sesira enze na magareta ya bachisulo naini handredi ndipo esausha banthu ba Aisraeli na mhamvu zonse kwa zaka twenti. ⁴ Lomba Debora m'neneri mwanakazi ( Mkazi wa Lapidoti), ndiye enzosogolera oweruza mu Israeli pa nthawi ila. ⁵ Enzonkhala pansi pa chimuti cha kanjeza wa Debora paakati pa Roma na Beteli mu chalo ca mmalupili ba Efulemu, ndipo banthu ba Aisraeli benzowela kwa yeve kuti abaweruze. ⁶ Eita Balaki mwana wa Abinomu wa ku Kadesi mu Nafitali. Echiti kwa yeve, '' Yehova Mulungu wa Aisraeli olamulila weo, 'nkhoya ku lupuli la Tabori, tola madoda teni sauzande bamu Nafitali namu Zebuloni. ⁷ Nikankhe Sisera mkulu wa nkhondo wa Yabini, kuti akumane nawe ku mkolo wa kisoni na magareta bake na gulu lake la nkhondo, nikupase chigonjeso pa beve.'' ⁸ Balaki echiti kwa yeve, '' Ngati ulute nane, nilute, koma ngati ulute nanelini, sinilutako.'' ⁹ Echiti, '' Nilute nawe mosakaikila. Koma njila yautiulutilemo niwewolini wati ukapasiwe ulemu, pakuti Yehova wapeleka Sisera m'manja mwa mwanakazi.'' Ndipo Debora enyamuka na kuluta naye Balaki ku Kedesi. ¹⁰ Balaki eita madoda ba Zebuloni naba Nafitale kuti bawele pamozi ku Kedesi. Teni sauzande madoda bemukonkha ndipo Debora eluta nawo. ¹¹ Lomba Heberi ( Mkena) ezipatula kufuma mwa Akena- benze bana ba Hobabu (Apongozi analume ba Mose)- ndipo ekhoma tenti yake pa nthundu mu Zanamu pafupi na Kedesi. ^{12 13} Pebemuuzya Sisera kuti Balaki mwana wa Abinomu wakwela lupili la Tabori, Sisera eita magareta yake yonse, magareta bachisulo naini handiledi, na asilikali bake onse benze nawo, kufumila ku Haroseti Hagoyim mpakana ku mkolo wa Kisoni. ¹⁴ Debora echiti kwa Balaki, ''Nkhoya! pakuti iyi ni siku yakupasa Yehova kugonjesa Sisera. Ko Yehova sakusogolela?'' Teto Balaki eluta kuchokela pa lupili la Tabori na madoda bake teni sauzande bomulondola. ¹⁵ Yehova esokoneza Sisera na magareta bake yonse na gulu lake lonse lankhondo na songa ya lupanga. ndipo Sisera eseluka pa gareta yake nakuutuka na mendo. ¹⁶ Koma Balaki epilikisha magareta na gulu yonse lankhondo mpakana kufukila ku Horoseti Hogoyim, ndipo gulu lonse lankhonda ba Sisera epayiwa na songa ya lupanga, ndipo kuliye munthu m'mozi epulumuka. ¹⁷ Koma Sisera eutuka na mendo kuluta ku tenti ya Yaeli, mkazi wa Heberi mkeni, pakuti penze mtendele pakati pa Yabini mfumu ya Hazori na banja ya Heberi mkeni. ¹⁸ Yaeli efumu panja kukumana naye Sisera ndipo echiti kwa Yeve, ''Patikuani mbuyawangu, patikilani kwa neo ndipo msayope.'' Teto epatukila kwa yeve nakuloba mu tenti mwake, ndipo emuvwinikila na bulangete. ¹⁹ Ndipo echiti kwa yeve, ''Napapata nipenkhoni manzi patontho nimweko, ndaba ninanjota.'' Esegula chola ca chikumba ca mkaka nakumpasa kuti amwe, ndipo emuvwinikila soti. ²⁰ Sisera echiti kwa yeve, ''Panama pa mulyango wa tenti. ngati kuwele munthu kuzokukosha kuti, ' muli munthu umu?', Unene kuti 'yai'.'' ²¹ Lomba teto Yaeli (Mkazi wa Heberi) etola mphompho cyokhomela tenti na sando m'manja mwake nakuluta kwa yeve mwakacetecete, pakuti enze mtulo, emukhoma m'mbali mwa mutu na sando mpakana mphompho yokhomela tenti yeloba kufika pansi, ndipo ecifwa. ²² Balaki penzopilikisha Sisera, Yaeli efuma kukumana naye ndipo echiti kwa yeve, ''Wela kuno, nikulangizye munthu waufuna.'' Teto eloba naye pamozi, noona Sisera alilele wakufwa na mphompho yokhomera tenti ili m'mbali mwa mutu wake. ²³ Teto pasiku lila Mulungu egonjesa Yabini, mfumu ya Kenani, pamenso pa Aisraeli. ²⁴ Ndipo mphamvu ya Aisraeli yekulilako kulilako kuposa Yabin mfumu ya Kenani, mpaka bemuononga.