¹ Apwiya yahin'himerya Moise, yiiraka: ² ''Munkuxe Aroni ni anaawe, ikuwo tjawe ni makhura oorelihiya, enama ya nkuttho wa itampi, inama pinli ni ettanka ya iphau tjoohikhla miropo. ³ Mwaathukumanye ntthu othene Mpani mwa Nthukumano''. ⁴ Nto, Moise ahipaka tjitjam'mo Apwiya yahimalyaya, ni atthu yahithukumana vankhora wa Enupa ya Nthukumano. ⁵ Moise ahahimerya atthu: ''Tiila Aapwiya ahimalyaya wira yiiriyeke''. ⁶ Moise ahin'waana Aroni ni anaawe, ni aharapiha ni maatji. ⁷ Owo ahinwariha Aroni nlyaya ni khunviriha mphantti nkina nxikoni mwawe, ahinwariha nlaya noolemela ni nlyaya nonankuttho. Nto, owo ahintthukwa ni nlyaya noonankuttho ni khunwariha-tho ntjako wootthaviya tjaana. ⁸ Owo ahintjathi epeitoral wa Aroni. N'hina wa epeitoral eyo, ahintjaatherya Urim ni Tumim. ⁹ Owo ahintjathi-tho etthu ekina m'muruni mwawe. Etthu iyo, elamina ya ewero, ekhaara yoowaarya, ntoko tjaarumale Apwiya. ¹⁰ Moise ahikuxa makhura oorelihiya, ahireeliha enupa ya nthukumano i tjitthu tjootene tjaarimo oholo wa Apwiya. ¹¹ owo ahittikitthela makhura waltari ikwaha thanu napili ni tjitthu tjootene tjaariw, ni ebaciya ni yoolipiha, wira areelihele Apwiya. ¹² Owo ahihela makhura oorelihiya vamuro wa Aroni ni ahinreliha oholo wa Apwiya. ¹³ Moise ahawaana anaawe Aroni khwaawariha ni malaya. Owo ahatthukwelela mikhoyi tjooreera m'muthanani mwaya ni ahatthukwa miru tjaya, ntoko tjaarumalyaya Apwiya. ¹⁴ Moise ahiwana epwittipwitti ntoko yoovaha mwaha wa itampi, ni Aroni ni anaawe yahintjaathi matataya vamuru wa epwittipwitthi yeeyo yawanyalyaya ntoko yoovaha mwaha wa itampi. ¹⁵ Owo ahimwinva, ahikuxa ephome awe ni ikatha khuttikitthela m'manyakani mwa altari; ahinreeliha altari, ahittikitthela ephome nkherekhere mwa altari ni ahinreeliha oholo wa Muluku ntoko olompa wooleveleliya itampi. ¹⁶ Owo ahikumiha ekurtura yootene yaari m'maruponi, yaakhuneela napwipwi, ni ipahntti pinli tja marupo ni ekurtura yaari kherekhere mwaya, ni Moise ahipaha tjootene n'yo waltari. ¹⁷ Nto epwittipwitthi, nrapala nawe ni enamawe, mpakha tjitthu tjikina tjaahipahiya, ota wa maxaxa, tjitjam'mo tjaarumale Apwiya. ¹⁸ Moise ahinwaana epwittipwitthi wira evahiye nkuttho, ni Aroni ni anaawe yahintjaatherya matataya. ¹⁹ Owo ahinva ni ahittikitthela ephome aya wakhula mphantti wa alatari. ²⁰ Owo ihakawanya enama ele iphantti tjoovirikana ni khupaha muro, ni iphantti iye ni ekurtura. ²¹ Owo ahirapiha marupo ni metto ni maatji ni khupaha waltari. Owo waari nkuttho wowunkhela, yoovaha yoopaheriya Apwia, tjitjam'mo Apwiya yanrumalyaya Moise. ²² Nto Moise ahoniherya eama ekinaku, ooreeliha, ni Aroni ni anaawe yahintjatherya matata aya vamuru va enama. ²³ Aroni ahimwinva, ni Moise ahikkuxa ephome vakhani ni khunttikitthela Aroni on'yaruni wawe mono woolopwana. ²⁴ Owo ahaawaana anaawe Aroni khwaattikitthela ephome vakhani nkherekhere wa n'yaru naya moono woolopwana, veekathani yuulupale ni valipwini. Nto, Moise ahittikhela makhura wakhula mphantti wa altari. ²⁵ Owo ahikhupa ekurtura, mwiila wootikana, ni ekurtura yootene yaari m'maruponi, yaakhuneela napwipwi, iphantti tjoopinli tja marupo ni ekurtura yaakhuneela, ni etara moono woolopwana. ²⁶ Ni nttankani mwa iphau tjoohikhala miropo, ekina yoopakiya ni makhura ni ekiya ya makeya ooxileya, ni khuhela n'hina mwa ikurtura ni vatarani mooo woolopwana. ²⁷ Owo ahintjaathi tjootene m'matatani mwa Aroni ni m'matatani mwa anaawe ni ahivaha ntoko yoovaha oholo wa Apwiya. ²⁸ Nto, Moise ahikuxa tjootene m'matatani mwaya ni khupaha waltari wira okhale nkuttho. Eyo yaari yovaha yoorelihiya, wunkhela wonrerela Muluku. Yaari yovahiya yoopaheriya Apwiya. ²⁹ Moise ahikuxa epeto ni khuvaha ntoko yoovaha yoottekenyeya oholo wa Apwiya. Owo waari mphantti wa enama yonrerela Moise, yooruma ya anankuttho, ntoko Apwiya yaarumalyaya. ³⁰ Moise ahikuxa makhura oorelihiya ni ephome yaari waltari; khunttikitthela Aroni, nkuwoni mwawe, n'hina wa anaawe ni ikuwo tja anaawe. Tjitjam'mo, owo ahinreliha Aroni ikuwo tjawe, ni anaawe ni ikuwo tjawe oholo wa Apwiya. ³¹ Nto, Moise ahin'himerya Aroni ni anaawe: ''Mwaapeye enama yankhora wa enupa ya nthukumano, ni vavo nkhuure ni iphau eri ntankani mwa oreelihiya, tjitjam'mo tjihimalyaaka, wira: 'Aroni ni anaaya alye eyoolya eyo'. ³² Ni entthuna ohala ya enama eyo ni ephau nyuwano n'haana opaha. ³³ Ni nyuwano n'hikhume vankhora va enupa yookumana n'hina mwa mahiku thanu napili, mpakha mahiku ahimiye amalele. Waholo animoorelihani n'hina mwa mahiku thanu napili. ³⁴ Eyo epakiye nihiku nlo ahimale t'Apwiya wira epakiye. ³⁵ Nyuwano nkhale othana ni ohiyu, n'hina mwa mahiku thanu napili, vankhora wa Enupa ya Nthukumano, ni mpwehe ehimamyale Apwiya, wira n'hikhwe, okhala wira tiyeeyo enrumaka''. ³⁶ Nto, Aroni ni anaawe yahipaka tjitthu tjootene Apwiya yaarumalyaya n'hina mwa Moise.