¹ Ola nkettelo wa yoovaha mwaha wa yoottheka. ² Tiyoowaryaxa. Ao ahaana onvaha nkuttho mwaminama onivahiya mwaha wa yoottheka nipuro onavhiya nkuttho ni ahaana ottikitthela ephome awe iphantti tjootene waltari. ³ Wakhula ekurtura aya ehaana ovahiya: ekurtura ya waamwiila, ekurtura ya m'maruponi, ⁴ iphantti tjopinli ni ekurturaya, tjiri waattamela m'masasuni, ni enkhuneela napwipwi, ni iphantthi tjoopinli tja marupo - tjootene n'yo tjihaana okhumihiya. ⁵ Nankuttho ohaana opaha tjitthu n'ya tjootene waltari ntoko yoovaha yoopahiya wa Apwiya. Ela tiyoovaha mwaha wa yottheka. ⁶ Wakhula nlopwana wa anankuttho ohaana olya ephantti ya yoovaha ela. Ehaana olyiya nipuro noowaarya, waholo tiyoowaarya. ⁷ Yoovaha mwaha wa itampi enolikana ni yoovaha mwaha wa yoottheka. Ekettelo emotjaru en'neettiheriya iphantti tjopinli. Eyo tiyanankuttho ontthuna walopela owenli aya. ⁸ Nankuttho, ontthuna ovaha nkuttho wa ntthu, ohaana okhalana yoohala ya yoovaha eyo. ⁹ Wakhula yoovaha ya inuku, entthuna wooxiya nfornoni, ni yoovaha enlikanaya entthunaya warikiya impirijitelani hata vatthu vanooxiya entthuna okhala ya nankuttho ontthuna ovaha. ¹⁰ Wakhula yoovaha ya inuku, hata ekhalaka yowum'ma ni yotakanihiya ni makhura, vamotjaru-tho entthuna okhala ya anaawe Aroni. ¹¹ Ola nkettelo yoovaha yooreerela, yeeyo atthu antthunaaya waavahaka Apwiya. ¹² Wakhala ntthu onvaha atthuna ovaha mahala, nto ohaana ovaha ni nkuttho wa iphau tjoopakiya ni miropo, ni tjootakanihiya makhura, ipahu tjoohikhala miropo, nto tjookhattiya ni makhura ni ipahu tjoopakiya ni ephepa yooreera, yootakanihiya makhura. ¹³ Ni-tho atthunaka ovaha mahala, owo ohaana ovaha, ni yoovaha ela yooreera, iphau tjooheliya miropo. ¹⁴ Owo ohaana ovaha emotja ya khula nthinto wa mikuttho n'yo ntoko yoowaavaha Apwiya. Eyo entthuna okhala ya nankuttho ontthuna ottikitthela ephome ya yoovaha waltari. ¹⁵ Ntthu onvaha yoovaha yooreera ni otthunaka ovaha mahala ohaana okhuura enamene nihiku na nkuttho. Owo ohihiye etthu mpakha oxeleliya. ¹⁶ Vano, wakhala yoovahawe eyo yaari ya natiri, hata yoovaha yowaakuveya, enemane ehaana okhuuriya nihiku owo onvahawe nkuttho, nto wakhula etthu entthuna ohala elyiyeke nihiku nikina. ¹⁷ Wakhula mphantti, wakhula enama ya nkuttho, entthuna ophiya nihiku na eneeraru, ehaana opahiya. ¹⁸ Wakhula enama ya nkuttho wooreerela ya ntthu yakhuriya nihiku na eneeraru, eyo khentthuna waakheliya, hata khentthuna okhalana nrerelo ntthu ovahale. Entthuna okhala etthu yoonanara, ni ntthu ontthuna olya onaakhalana etampi. ¹⁹ Wakhula enama entthuna okwata etthu yoonanara ehikhuuriye. Ehaana opahiya. Enama ekina, wakhula ntthu oreera okhureke. ²⁰ Wa tjootene, ntthu oohiloka, ontthuna okhuura enama ya nkuttho wooreera eri ya Apwiya, ntthu owo ohana winviya eriyari ya atthu awe. ²¹ Akhaa ontthuna okwata etthu yoohiloka - hata ohiloka wa nlopwana, hata ohiloka wa etthu yootakhala, hata etthu ekina yooholoka hata yoothanyeya, ni owo numala okhura enama ya nkutth wa Apwiya, ntthu owo ohaana winviya eriyari ya atthu awe''. ²² Nto Apwiya yahin'himerya Moise, wira: ²³ ''Mwahimerye atthu a Wisrayeli wira: 'N'hikhure ekurtura ya enyompe hata epwittipwitthi hata ya epuri. ²⁴ Ekurtura ya enama ekwiiye vohikhala ya nkuttho, hata enama yinviye ni mwaminama a ntakhwani, ehana ovareliya nteko nkinaku, nto vekhweeli n'hikhuure. ²⁵ Wakhula ntthu ontthuna okhuura ekurtura ya khula enama entthuna ovahiya ntoko yoovahiya yoopahiya wa Apwiya ohaana winviya eriyari ya atthu awe. ²⁶ N'hiikhureereke ephome m'mawan'nyinyu moothene, hata ya mwaaxipalame hata ya mwaminama. ²⁷ Wakhula ntthu ontthuna okhura ohaana winviya eriyari ya nloko nawe''. ²⁸ Nto Apwiya yahin'himerya Moise, wiira: ²⁹ ''Mwahimerye atthu a Wisrayeli wira: 'Ole ontthuna waavaha nkuttho woorerela Apwiya ohaana waaruhela Apwiya yoovaha eyo. ³⁰ Yoowavaha Apwiya ehaana opahiya ni owaaniya ni matataya. Owo ohaana owaana ekurtura ni ephantti yooreerela wira ekhale yoovaha yoottittimiheya, yoowaniya oholo wa Apwiya. ³¹ Nankuttho ohaana opaha ekurtura waltari, nto epeto ekhaleke ya Aroni ni otjuulu awe. ³² Nyuwano mwaavaheke anankuttho etara ya moono woolopwana ntoko yoowarerela, mphantti wa nkuttho wa yoovaha enyu. ³³ Nankuttho, wa m'motja wa otjuulu wa Aroni, onivaha ephome ya nkuttho woorerela ni ekurtura - owo okhalaneke etara ya moono woolopwana ntoko yonrerelawe ya yoovaha. ³⁴ Waholo miyano kin'nikuxa eriyari ya atthu a Wisrayeli epeto ni etara enivahiyaka Miyano, ni Miyano kin'novaha Aroni, nkhulupale a anankuttho; iyo tjintthuna okhalaka miphantti tjoovaha tja atthu a Wisrayeli. ³⁵ Ola mphantti wa Aroni ni otjuulu awe wa tjoovaha tjoopaheriya Apwiya, nihiku Moise awoniheralyawe waarumela Apwiya nteko wa onankuttho. ³⁶ Ola tori mphantti Apwiya yaarumalyaya wira avahiyeke atthu a Wisrayeli, nihiku owo arelihalyawe anankuttho. Owo tuntthuna okhala mphantti aya wa maloko othene. ³⁷ Ela ekettelo ya nkuttho, yoovaha ya inuku, yoovaha mwaha wa itampi, yoovaha mwaha wa yoottheka, yoovaha yoorelihiya, ni nkuttho woorerela, ³⁸ tjen'yo Apwiya yanrumalyaya Moise Omwaako Sinayi nihiku aarumalyawe atthu a Wisrayeli wira avaheke nkutho aya wa Apwiya Omwaako Sinayi'''.