¹ Apwiya yahin'himerya Moise, wira: ² ''Mwahimerye atthu a Wisrayeli wira: 'Akhala ntthuna om'mana natiri, ontthuneya wira iireele mphanttin ntjurukhu n'hina wa ntthu, owo avahe Apwiya ottharelaka ikettelo n'nya: ³ Etjitjapo ya ntjurukhu ya nlopwana orina iyakha miloko miili mpakha miloko thanu namotja enrowa okhalaka eparatha icikulu miloko mithanu, ottharelaka ecikulu ya nipuro noowarya. ⁴ Wa nthiyana a iyakha imotjaru, etjitjapo aya entthuna okhala icikulu miloko miraru. ⁵ Okhuma iyakha thanu mpakha miloko miili, etjitjapo ya nlopwana, entthuna okhala icikulu miloko miili ni nthiyana, icikulu muloko. ⁶ Okhuma mweeri m'motja mpakha iyakha thanu, etjitjapo ya nlopwana entthuna okhalaka icikulu thanuya eparatha ni nthiyana, icikulu tthaaru tja eparatha. ⁷ Okhuma iyaakha miloko thanu namotja wa nlopwana, ehaana okhala etjitjapo ya icikulu muloko ni thanu ya eparatha ni nthiyana, icikulu muloko. ⁸ Vano, wakhala ntthu owo om'maale natiri ahiwerye oliva ntjurukhu wo wootthuneya, nto, ntthu owo atthuna ovahiya ohaana orowa wixooniha wa nankuttho. Nankuttho onaarowa onweha ntthu owo, ottharelaka etjitjapo ele atthunae oliviya ni ntthu owo. ⁹ Akhala ntthu ontthuna ovaha nkuttho enama wa Apwiya, ni Apwiya khwaakhela nto enama eyo ehaana ovahiya Owo. ¹⁰ Ntthu owo ohin'hiye n'nakhala okuxa enama ekina, nkumi ni owereiya hata owereiya ni nkumi. Wakhala owo, wakhula ephantti, ankuxa mwaminama nkina, owenli onooreelihiya. ¹¹ Vano, entthunaya ovahiya Apwiya yakhala, vekhweeli, yoohiloka, mpakha Apwiya ohaakhela, nto ntthu owo ohaana orowana wa Nankuttho. ¹² Nankuttho onarowa oweha etjitjapo ya enama eyo. Wakhula etjitjapo nankuttho ontthuawe ovaha enama eyo, entthuna okhala etjitjapo yoomalela. ¹³ Ni wakhala mwanene ontthuna woopola, nto ya enethanu wa ntjurukhu awe entthuna watjereriya ntjurukhu athumaniyawe. ¹⁴ Okathi ntthu ontthunawe oreeliha enupa awe wa Apwiya, nto nankuttho onoohimya etjitjapo aya. Wakhula etjitjapo entthuna ohimiya ni nanttho, eyo tintthuna okhala etjitjapo aya. ¹⁵ Vano, mwanene avahererya enupa awe khinaaphela-tho woopola, nto mphantti wa eneethanu ya etjitjapo aya, enimwaatjereriya etjitjapo yathumaniyaya. Tjitjam'mo, enupa eyo enontthikela. ¹⁶ Akhala ntthu ontthuna ovahererya ephantti ya etthaya awe, nto etjitjapo aya entthuna ottharelana ni ipyo tjinaaliya. Ehumeri ya ecevata entthuna owehiyaka icikuku miloko thanu tja eparatha. ¹⁷ Owo avaha ematta awe eyakha yoohakalala, etjitjapo rntthuna ohimiya entthuna okhala emotjaru. ¹⁸ Vano, owo avaha ematta awe eyakha eyo evinrene, nankuttho ohaana waalakhanya etjitjapo ottharaka iyakha tjin'haala ophiya eyakha yohakalala, etjitjapo entthuna ohimiya enuuvukuliya. ¹⁹ Nlopwana owo ontthuna ovaha ematta eyo, atthuna ottikiha, nto owo ohaana waatjererya mphantti wa eneethanu wa ntjurukhu wahimiye nto enootthikela okhala ematta awe. ²⁰ Owo ahiwerye woopola ematta, ehoopoliye-tho. ²¹ Ohiya-vo, ematta eyo, yataphuliya eyakha yoohakalala, entthuna okhala yoovaha yoowara wa Apwiya, nto ematta evahiye Apwiya. Eyo entthuna okhala ya nankuttho. ²² Akhala ntthu ontthuna waavaha Apwiya ematta ethumalyawe, nto khohikhala ya amutji awe, ²³ nto, nankuttho onaarowa ohimya etjitjapo mpakha eyakha yoohakalala ni ntthu owo ohaana oliva ntjurukhu owo, nihiku nlo, ntoko yoovaha yoowarya ya Apwiya. ²⁴ Eyakha yoohakalala, ematta enontthikela ntthu ole aathum'me, mwanene ematta. ²⁵ Ntjurukhu wootene wahimiye, entthuna ottharela etjitjapo ya mpani moowarya. Miloko mili tja egera ehaana okhala ecikulu emotja. ²⁶ Vano enama yoopatjeriya entthuna okhala ya Apwiya ni avahiyeke. Hata okhala enyompe ni epwittipwitthi, entthuna okhala ya Apwiya. ²⁷ Enama eyo yahikhale ekumi, nto mwanene oopoleke tjitjapo yoorerela ni ephantti ya eneethanu enimwaatjereriya, etjitjapo ele. Enama eyo yahoopoliye, nto enootumihiya ni etjitjapo entthuna ohimiya. ²⁸ Vano, ehikhale ntthu ontthunawe wavaha Apwiya, wa tjootene jirinawe, hata okhala ntthu ni enama, hata n'hakhu awe wa amutji awe, etumihiyeke ni yoopoliyeke. Yootene envahiya enkhala yoowarya wa Apwiya. ²⁹ Ehikhale entthuna woopoliya ni etthu yaatthuna ottikhiya. Ntthu owo onaakhwa. ³⁰ Ya enamuloko yootene nlaponi, hata ipyo tja m'matta, hata mihokorokho tja miri, titjaa-Apwiya. Iyo tjinreeliheliya Apwiya. ³¹ Akhala ntthu ontthuna woopola ya enamuloko, ohaana waatjererya ntjurukhu ephantti ya eneethanu. ³² N'hina wa enamuloko ya inama tjin'huwiya, wakhula ontthuna ovira vattottoni va nkukhuli, ehaana ovahiya Apwiya. ³³ Nkukhuli owo ahipheele enama ekumi hata yoowereiya, ni owo ahivirikanihe ekina ni ekina. Owo avirikaniha ekina ni ekina, tjoopili tjinoorelihiya. Ni eyo khenoopoliya. ³⁴ Iya titjooruma Apwiya yanvahalyaya Moise Omwako Siyoni, wira avahe atthu a Wisrayeli.