¹ Paulo, mutumishi wa Mulungu na mutume wa Jesu Masihi, kpwa imani ya atsagulwa a Mulungu na ku-umanya ujeri ukubalianawo na ulungu, ² hamwenga na kuluhiro ra uzima wa milele ambawo Mulungu, ariye kakenga mutu, wewahidi hata kabila vizazi vya kare na kare. ³ Kpwa wakati wa sawa achika lwazu nenore kuchirira mahubiri ambago neaminiwa nago sawa na amuri ya Mulungu mokoli wehu. ⁴ Kpwa Tito, mwana musikizi kahi za imani, Neema na amani ilayo kpwa Paba Mulungu na Jesu Masihi mokoli wehu ikale nawe. ⁵ Kpwa riri, nekuricha Kirete, ili uweze kpwika chila chitu sawa ambacho kachisawa na utsagule atumia a kanisa chila kanisa kpwa chila lalo here nirivyo kulakiza. ⁶ Chilongozi ni akale bila lawama, mulume wa muche mumwenga, na ana aminifu mvasioambwa na kutsajali wala kutsatii. ⁷ Ni muhimu kpwa mwemerezi, here adziyepewa kazi ya kpwemerera kanisa ra Mulungu, akale bila lawama. Asikale mujeuri, asikale mutu wa kutsukirwa chirahisi, na asikale murevi kupindukia, mugomvi wala mulafi wa mali isiyokala ya halali. ⁸ Bali, akale mukarimu, muhenza kuhenda madzo, kpwelewa, mutu mwenye kudzitawala, munyofu, na mutakatifu. ⁹ Arigbwire neno ra Mulungu tototo ariro rifundishwa, ili aweze kpwenjiza moyo anzie kpwa neno ra ujeri na kurekebisha mvendao chinyume naye. ¹⁰ Kpwa kukala apinga Masihi ni anji, mvario na maneno manji ga ushawishi na ulongo, hasa mvamvo mvario gbwagbwatsi. ¹¹ Ni muhimu sana kumvachemera mvariche. Mvakosera familia nyinji kpwa kumvafundisha ulongo ili kudzifaidisha kpwa mambo garigo mvasindegafundisha. ¹² Mumwenga kahi za manabii a kpwao yudzamba, "Akirete ni alongo siku zosi, mashetani ai na alafi hamwenga na ukaha." ¹³ Ushuhuda uu ni wa jeri. Kpwa vivyo, mvakanyeni ili mvakale na imani ya jeri, ¹⁴ musimvariche mvakasikiza ngano za Chiyahudi ama amuri za atu mvendao chinyume na ujeri. ¹⁵ Kpwa mvamvo mvario asafi, chila chitu ni chisafi. Ala kpwa mvario akorofi na mvasioamini, kakuna chiricho chisafi, isokala akili zao hamwenga na nia zao zikorofishwa. ¹⁶ Mvadzihenda kumumanya Mulungu, ala mvamukana kpwa mahendo gao. Ni atu a kutsukizya, akosaji mvasositahili kpwa kazi yoyosi mbidzo.