¹ Nzoni sasa, murio matajiri, rirani kpwa sauti ya dzulu kpwa matatizo gandigokudza dzulu yenu. ² Utajiri wenu udzola, na nguo zenu zidzafunwa ni mabulu. ³ Dhahabu zenu na pesa zenu kazina thamani, na kutuye indakala shahidi dzulu yenu. Indarya nyama zenu here moho. Mudzidzikira hazina zenu kpwa siku za mwisho. ⁴ Lolani, mariho ga ahenzikazi enu ambamvo kamudzamvariha mvariovuna minda yenu, garira kumvashitaki. Viriro vya avunaji vifikira masikiro ga Bwana wa Majeshi. ⁵ Mudzi-ishi kpwa anasa duniani na kudzifurahisha enye. Mudzidzinonesha mioyo yenu kpwa siku ya kutsinzwa. ⁶ Mudzimuhukumu na kumolaga mwenye hachi. Kadzamvapinga. ⁷ Vumirirani, bai ndugu, mpaka kudza kpwa Bwana. Lolani jinsi mukurima arindiravyo mavuno ga thamani kula kpwa intsi, arindiravyo kpwa uvumirivu, mpaka mutsanga upate mvula za kpwanza na za mwisho. ⁸ Mwimwi namwi, mukale avumirivu, kazani mioyo yenu, kpwa kukala Bwana yuhehi kudza. ⁹ Ndugu, musinung'unikirane mwimwi kpwa mwimwi, musidze mukahukumiwa. Lolani, hakimu adzema muyangoni. ¹⁰ Halani mufano, ndugu, kula kpwa mateso na uvumirivu wa manabii, mvarionena kpwa dzina ra Bwana. ¹¹ Lolani, hamvatala mvariovumirira kukala abarikiwa. Mwesikira kuvumirira kpwa Ayubu, na mwamanya kusudi ra Bwana, arivyo wa mbazi na rehema. ¹² Zaidi ya gosi, ndugu zangu, musilahe, kpwa dzina ra mulunguni wala duniani, ama kpwa kulaha kokosi. Badalaye, kala ndevyo mwambe kare "Ndevyo" na kala sevyo mwambe "Sevyo," ili musenjire hukumuni. ¹³ Je, kunaye mumwenga kahi yenu atesekaye? Na avoye. Je kunaye ariye muchangamufu? Na amwembere sifa Bwana. ¹⁴ Je, kunaye ariye walumwa? na amvehe vilongozi a kanisa, mvamuvoyere. Namvamuhake mafuha kpwa dzina ra Bwana. ¹⁵ Mavoyo ga imani gandamuhoza mukongo, naye Bwana andamwenula. Ichikala ahenda dambi, Mulungu andamusamehe. ¹⁶ Kpwa vivyo, ungamani dambi zenu mumwenga kpwa munjine, na kuvoyerana, ili muweze kuhozwa. Mavoyo ga mwenye hachi nikukala gana nguvu. ¹⁷ Eliya wekala mudamu dza sisi. Wevoya kpwa bidii mvula isinye, na kainyere dzulu ya intsi kpwa muda wa miaka mihahu na miezi mihandahu. ¹⁸ Ndiho Eliya achivoya keheri. Mulunguni kuchirichira mvula dzulu ya intsi nayo intsi ichivyala matunda. ¹⁹ Ndugu zangu, ichikala yoyosi kahi yenu adzangamika kula kpwa ujeri, na munjine achimudzya, ²⁰ mutu iye amanye kukala yoyosi amudzyaye mwenye dambi kula kpwa njiraze za dambi andayepusha nafusiye kula kpwa chifo naye andafunikpwa kula kpwa unji wa dambi.