¹ Jakobu, muhumwa wa Mulungu na wa Bwana Jesu Masihi, kpwa makabila kumi na mairi garigo gavika, namvalamusa! ² Talani kukala ni furaha muno, ndugu zangu, muchiraho kahi za majezo manji. ³ Muchimanya kukala kujezwa kpwa imani yehu kpwavyala uvumirivu. ⁴ Bai, richani uvumirivu uikamilishe kaziye, ili kpwamba muweze kukomala chikamilifu, bila kuhungukirwa neno rorosi. ⁵ Ala ichikala mumwenga kahi yenu waimala hekima, aivoye kula kpwa Mulungu, ambaye nikuilavya kpwa upore hasiho kuchemera mvosi mvaivoyao. ⁶ Ala aivoyaye kpwa imani, bila shauku. Kpwa kukala mwenye shauku ni here imbi kahi ya bahari, risukumwaro ni peho na kuzungulushwa. ⁷ Mutu namuna iyo asikuluhire kupata chitu kula kpwa Bwana; ⁸ mutu iye ana nia mbiri, kana wamuzi kahi za njiraze zosi. ⁹ Ndugu ariye tsini, adzivunire kukala dzulu, ¹⁰ ariye dzulu adzivunire kukala tsini, kpwa kukala andatsupa here luwa ra tsakani. ¹¹ Kpwa kukala dzua nikombola na dzoho ra kocha na ku-umisha nyasi. Luwa rikanyauka rikagbwa, udzowe wosi ukabanangika. Vivyo, mutu tajiri andatsakala kahikahi ya charo. ¹² Anabaha mutu iye avumiriraye majezo. Kpwa kukala ashindaho jezo riro, andahochera taji ya uzima, ambayo yeahidiwa kpwa mvamuhenzao Mulungu. ¹³ Mutu ajezwaye asambe, "Najezwa ni Mulungu," kpwa kukala Mulungu kajezwa na mai, wala Mulungu mwenye kajeza mutu yoyosi. ¹⁴ Ala chila mutu ni kujezwa kpwa tamaaze mwenye, imuvuhayo kpwenda kure na Mulungu. ¹⁵ Ndiho tamaa ikagbwira mimba, ikavyala dambi, nayo dambi ichikula chikamilifu, ikavyala chifo ¹⁶ Musikengbweni, ndugu zangu ahenzwi. ¹⁷ Chila zawadi iriyo mbidzo na kamilifu ila dzulu. Ni kuteremushwa kula kpwa Paba wa mulangaza. Kpwakpwe kakuna magaluko wala chivurivuri kpwa chausa cha kugaluka. ¹⁸ Mulungu wetsagula kuhupa sisi chivyazi kpwa neno ra ujeri, ili kpwamba huweze kukala vyalo ra kpwanza miongoni mwa viumbevye vyosi. ¹⁹ Mwarimanya riri, ndugu zangu ahenzwi: Chila mumwenga wenu na akale na haraka ya kusikira, mupore wa kunena, na mupore wa koro. ²⁰ Kpwa kukala koro za mudamu kaziweza kuhenda hachi ya Mulungu. ²¹ Kpwa vivyo ikani kure uchafu wa dambi na ui wosi uriwoko. Kpwa upore rihochereni neno ridzironyalwa ndani yenu, ambaro rina uwezo wa kokola roho zenu. ²² Kalani ahenzi a neno, si kurisikira tu, kudzikenga nafusi zenu enye. ²³ Kpwa kukala yoyosi arisikiraye neno bila kurihendera kazi ni sawa na mutu adzilolaye usowe kahi za chilolo. ²⁴ Ni kudzilola usowe, akenda kisha baada ya muda mufuhi akasahau arivyo. ²⁵ Ala mutu iye ailolavyo kpwa makini sheria kamili, sheria ya uhuru, na kpwenderera kuitii, si kukala musikizaji tu asahauye, yuyu mutu andabarikiwa kpwa mahendoge. ²⁶ Ichikala mutu yoyosi andafikiri moyoni mwakpwe kukala agbwira dini, ala kaweza kuthibiti lulimilwe, wakenga rohoye na diniye kaina faida. ²⁷ Dini iriyo safi na isiyo banangika mbere za Mulungu wehu na Paba mulunguni ni; kumvasaidia ana achia mvaso na Paba, na magungu kahi za mateso gao, na kudzirinda na ufisadi wa dunia.