¹ Paulo, mutume wa Jesu Masihi kpwa mahenzo ga Mulungu, sawa na ahadi ya uzima uriwo ndani ya Masihi Jesu, ² kpwa Timotheo, mwanangu muhenzwi: Neema, rehema na amani kula kpwa Mulungu Paba na Masihi Jesu Bwana wehu. ³ Namupa mumvera Mulungu, ariye namuhumikira kpwa nia mbidzo here mvarivyohenda Paba zangu mvario nitangulia, here nikukumbukiraho chila mara kahi za mavoyo gangu, usiku na mutsana. ⁴ Nikumbukiraho matsozi ga kpwako, natamani kukona, ili nami notsazwe ni furaha. ⁵ Nikala nichikumbushwa imaniyo halisi, iriyo haho mwanzo yekala kpwa waweyo Loisi na mameyo Yunisi na nina uhakika kukala imani iyo unayo pia. ⁶ Ndosa nakukumbukiza kutsetsera moho wa karama ya Mulungu iriyo ndaniyo kpwa njira ya kupwikira mikono yangu. ⁷ Kpwa kukala Mulungu kahupere roho ya woga, bali ya nguvu na uhenzo na moyo wa chasi. ⁸ Kpwa vivyo usiwonere haya ushuhuda wa Bwana wehu, wala wangu mimi, Paulo mufungbwawe. Bali, ushiriki kahi za mateso kpwa ajili ya injili, kulingana na uwezo wa Mulungu, ⁹ ariyehokola na kuhweha kahi za mweho mutakatifu. Kahendere vivi kulingana na kazi zehu bali kulingana na neema na mupangowe mwenye, ariyohupa kahi za Masihi Jesu kabla ya nyakati za kpwanza. ¹⁰ Ala sasa, wokoli wa Mulungu udzifunulwa kare kpwa kudza kpwa mokoli wehu Masihi Jesu, ariyekomesha chifo na kureha uzima usiwo sira kpwa mulangaza wa injili. ¹¹ Kpwa riri, netsagulwa kukala muhubiri, mutume na mwalimu. ¹² Kpwa sababu ii, nasirima hata mimi. Ala sona waibu kpwa kukala namumanya iye niriye mwamini. Nina uhakika kukala iye waweza kuchitsunza chira niricho chilavya kpwakpwe muhaka siku iyo. ¹³ Kumbuka mufano wa umvoro wa waminifu uriwo usikira kula kpwangu, hamwenga na imani na mahenzo garigo ndani ya Masihi Jesu. ¹⁴ Gatsunze mambo madzo arigokupa Mulungu kuchirira Roho Mutakatifu, aishiye ndani yehu. ¹⁵ Wamanya kukala, osi mvaishio kahi za Asia mveniricha, kpwenye kundi riri ra Figelo na Hemogene. ¹⁶ Bwana airehemu nyumba ya Onesifero kpwa kukala mara nyinji waniburudisha na kazonerere waibu nyubgwe zangu. ¹⁷ Badalaye, arihokala Roma wenitafuta kpwa bidii naye achinipata. ¹⁸ Mulungu amwajalie na rehema kula kpwakpwe siku iyo. Here arivyonisaidia nirihokala Efeso, uwe wamanyato sana.