¹ Kpwa vivyo, uwe mwanangu, ukale hodari kahi za neema iriyondani ya Masihi Jesu. ² Na mambo urigo gasikira kpwangu kahi za mashahidi anji, mvape atu aminifu mvario mvandaweza kumvafundisha anjine pia. ³ Shiriki mateso hamwenga nami here shikari mudzo wa Masihi Jesu. ⁴ Kakuna shikari ahumikaye wakati achidzihusisha na shuhuli za kawaida za maisha gaga, ili aweze kumufurahisha mubomuwe kazini. ⁵ Pia, ichikala mutu washindana here mwanariadha, kavikpwa taji asihoshindana kpwa kutua sheria. ⁶ Ni muhimu kukala mukurima mwenye bidii akale wa kpwanza kuhochera fungu ra mavunoge. ⁷ Ririkana dzulu ya ninenago, kpwa kukala Bwana andakupa welewa kahi za mambo gosi. ⁸ Mukumbuke Jesu Masihi, kula lukolo lwa Daudi, ariyefufulwa kula kpwa afu. Ii ni sawa na umvoro wangu wa injili, ⁹ uriwo ndiwo chisingbwa cha mimi kusirima hata kufungbwa nyugbwe here muhalifu. Ala neno ra Mulungu karifungbwa kpwa nyugbwe. ¹⁰ Kpwa vivyo navumirira mambo gosi kpwa ajili ya mvario tsagulwa, ili namvo mvaupate wokofu uriwo kahi za Masihi Jesu, hamwenga na utakatifu wa kare na kare. ¹¹ Usemi uu ni wa kpwaminika, "Ichikala hudzefa hamwenga naye, hundaishi hamwenga naye pia. ¹² Ichikala hundavumirira, hundatawala hamwenga naye pia, ichikala hundamukanuka iye, naye pia andahukanuka sisi. ¹³ Ichikala kahundakala aminifu, iye andasala kukala mwaminifu, kpwa kukala kaweza kudzikana mwenye." ¹⁴ Enderera kumvakumbukiza dzulu ya gaga. Mva-amuru mbere za Mulungu mvariche kubishana dzulu ya maneno; kpwa kukala kavina faida kahi za dzambo riri isihokala kubananga mvo mvasikizao. ¹⁵ Dzibidishe kudzonyesa kukala udzikubalika kpwa Mulungu, here muhenda kazi asiye na chausa cha kulaumiwa, arifundishaye neno ra ujeri kpwa usahihi. ¹⁶ Kalani kure na majadiliano ga chidunia, gasokala ga dini. ¹⁷ Maneno gao gandenera here rondandugu. Kahi yao ni Himenayo na Fileto. ¹⁸ Mvamva ni atu mvariokosa ujeri. Nikpwamba kukala ufufulo wehendeka kare, mvaipendua imani ya baadhi ya atu. ¹⁹ Hata vivyo, musingi imara wa Mulungu wadumu. Una maneno gaga, "Bwana wamvamanya mvario akpwe," na "Chila arihadzaye dzina ra Bwana ni lazima adzitenge na udhalimu." ²⁰ Kahi za nyumba ya chitajiri si kukala vimo vyombo vya dhahabu na shaba hacheye. Pia kuna vyombo vya mihi na mutsanga. Baadhi ya vivi ni kpwa ajili ya mahumizi gasigo na heshima. ²¹ Ichikala mutu andadzitakasa mwenye kula kpwa mahumizi gasigo ga heshima, iye ni chombo cha kuheshimika. Adzitengbwa, adzilengbwa kukala maalumu, mwenye manufaa kpwa Bwanawe, na adzitayarishwa kpwa chila kazi iriyo mbidzo. ²² Ala zichimbire tamaa za ujanani. Tafuta utakatifu, imani, uhenzo, na amani hamwenga na aratu mvamwehao Bwana kpwa moyo musafi. ²³ Ala ukahale upumbavu na maswali ga chipuzi. Wamanya nikuvyala chuki. ²⁴ Mutumishi wa Bwana kamalikana kuheha. Badalaye, akale mupore kpwa mvosi, aweze kufundisha na akale muvumirivu, ²⁵ arekebishe mvamukoserao kpwa upore. Nikpwenda Mulungu akamvapa toba kpwa ku-umanya ujeri. ²⁶ Nikpwenda mvakapata ufahamu mvakawepuka muhego wa shetani, baada ya kumvagbwira kpwa uhenzowe.