¹ Usemi uu ni wa kpwaminika; ichikala mutu watamani kukala mwemerezi, watamani kazi mbidzo. ² Kpwa vivyo, mwemerezi ni akale mutu mwenye nguma mbidzo. Akale mulume wa muche mumwenga. Ni lazima akale na chasi, busara, mwenye utaratibu, ukarimu na akale ni mukarimu. ³ Asikale munwadzi wa uchi kupindukia, asikale mugomvi bali akale mupore, na mwenye kuhenza amani. Asikale mwenye kuhenza pesa muno. ⁴ Akale mwenye uwezo wa kumvemerera tototo atu a nyumbani mwakpwe, ahakikishe anae mvamuheshimu na kumutii kpwa hali zosi. ⁵ Kpwa kukala, ichikala mutu kamanya kumvemerera atu a nyumbani mwakpwe mwenye, andaremereradze kanisa ra Mulungu? ⁶ Asikale mu-umini musha, ili asidze akadzikutula kpwa madzivuno akagbwa kahi za hukumu here yuyatu mwovu. ⁷ Ni lazima pia akale na nguma mbidzo kpwa osini mvarionze ili asidze akadzipata kahi za waibu na muhego wa mwovu. ⁸ Mashemasi nao, mvafaa kukala enye kustahili heshima, mvasikale enye kauli mbiri. Mvasinwe uchi kuchira chasi, mvasikale alafi. ⁹ Mvaweze kuitunza kpwa dhamira safi ya jeri, ya imani irofunulwa. ¹⁰ Mvakale pia mvathibitishwa kpwanza, kisha mvaweze kuhumikira anjine kpwa kukala kamvana lawama. ¹¹ Ache ao namvo ni vivyo, mvakale enye heshima mvasikale asingiziraji, mvakale na chasi na aminifu kpwa mambo gosi. ¹² Mashemasi ni mvakale alume a muche mumwenga chila mutu. Mvaweze kpwemerera tototo ana ao na nyumba zao. ¹³ Kpwa kukala aratu mvahumikao tototo, nikupata wamuzi mudzo na ujasiri mubomu kahi za imani iriyo kahi za Masihi Jesu. ¹⁴ Nakpwandira mambo gaga nichikuluhira kudza kpwako siku si nyinji. ¹⁵ Ala nichichelewa, nandika ili upate kumanya hali undivyo enenda kahi za nyumba ya Mulungu, ambaro ni kanisa ra Mulungu ariye muzima, nguzo na musaada wa jeri. ¹⁶ Hosi hwehika kukala ujeri wa Mulungu huriwo funulirwa ni mubomu. " Weonekana kahi za mwiri, achithibitishwa ni Roho, achonekana ni malaika, achitangazwa miongoni mwa mataifa, achaminiwa ni urimwengu, na achihalwa dzulu kahi za utukufu.