¹ Paulo, Silvano na Timotheo. Kwa kanisa ra Thesalonike kahiza Mulungu beyehu na Bwana Jesu Kristo. ² Neema na ikale kwenu na reri yombolayo kwa Mulungu Beyehu na kwa Bwana Yesu Kristo. ³ Ivhavho haja ya siswi kumushukuru Mulungu tsiku zosini kwa ajili ya mwimwi, enehu. Kwa kukala vivyo ndo ihenzakanavyo kwehu kwa kukala imani yenu inakula muno, na uhenzowenu kwa chila mutu yuna-enderera konjezeka. ⁴ Kwa vivyo siswi enye hunaona nyemi dzulu ya makanisa ga Mulungu. Hunasumurira dzulu ya uvumirivu wenu na imani muriyo nayo kahiza mateso gosini. Hunasumururira dzulu ya mateso mugavumirirago. ⁵ Ii ndo sharia ya hukumu ya hachi ya Mulungu ili mwimwi mutalwe kukala munafaha kwinjira ufalume wa Mulungu urio kwa uo munasirima. ⁶ Kwa kukala ni hachi kwa Mulungu kuarivha kusirima arahu ariomusirimisha mwimwi, ⁷ na kuavha nyemi mwimwi murio munasirimishwa vhamwenga naswi. Yundahenda vivi muda arahu wa kufunulwa kwa Bwana Jesu kula Mulunguni vhamwenga na malaika a uwezowe. ⁸ Kahiza mwanga wa moho yunda-arivhiza chisasi ao asio mumanya Mulungu na asio-henza injili ya Bwana wehu Jesu. ⁹ Andasirima kwa ma-angamiko ga kare na kare, kanda na Bwana na utukufu wa mukotsewe. ¹⁰ Yundahenda vhavho vhandokudza ili onulwe ni atu atue na kwangalazwa ni osini ario-mwamini. Kwa kukala ushuhuda wehu kwenu waminiwa. ¹¹ Kula na gago hunamuvoyera mwimwi tsiku zosi. Hunavoya kukala Mulungu wehu amutale kukala munafaha. Kwihiwa, hunavoya kukala amutimizire chila muricho-chaza cha udzo na chila kazi ya imani kwa mukotse. ¹² Hunavoya mautu gaga ili muweze kuri-unula dzina ra Bwana Jesu, hunavoya kukala munulwe vhamwenga naye kwa sababu ya neema ya Mulungu wehu na Bwana Jesu Kristo.