¹ Paulo, omukholi wa Nasaye, khandi omurume wa Yeso Kirisito, khulondana nende obusubiri bwa balobole ba Nasaye, nende khufukirira obwadieri obulimo bunasaye, ² mulinaaya lio bulamu bwe chinyaanga chioosi, obwa Nasaye arabachaanga khaba, obwayalaka esialo nisisiri khuchaaka. ³ Ne mubikha ebiakhoyera yafunula likhuwa liaye khubirira mu khuyaala khwa ndaberesibwa khulondana nende lilako lia Nasaye omuonia wefwe. ⁴ Khu Tito, omwana wange mubusubiri obwa khwambanisibwamo. Obukoosia, esisa, nende muleembe khurula khu Nasaye Sefwe nende Mwami wefwe Yeso Kirisito omuonia wefwe. ⁵ Ndakhulekha Kirete khulwe sifune sino, mbwe onyoole khukololosia ebiindu birolerera, nende khurao bakofu mu buli lidokho kori ngolwa ndakhubolera okhukhola: ⁶ Ne omukofu akhoyera okhuba omuundu obula likhuwa lio khukhalakirwa, musaacha wo mukhasi mulala, oli nende abaana besikwa, abarakhalakirwa okhuba abemilwano kose abakhayi. ⁷ Khulwo khuba musidoti akhoyera okhuba omuundu owo khurakhalakirwa, kori nga omwemeresi wainyuumba ya Nasaye. Ne araba omwangu we lirima, araba omumesi kose owo khusolana, araba omuundu wo kuliira khaba. ⁸ Arali akhoyera okhuba omuundu wo khwingisia bakeni, owakheera makhuwa malayi, onyala khweyimirira omwene, mulungifu, mutakatifu, onyala okhwelinda omwene. ⁹ Nadiira likhuwa lio busubiri kori ngolwa yekesibwa, mani anyoole khudinyisia abaandu mumekesio ko bulamu nende okhukhira abakhayi. ¹⁰ Khulwo khuba khuli nende abakhayi babacha baangi, abali nende amakhuwa akabula obukhonyi, okhirakhoo bala abesikhebo. ¹¹ Abe minwa kiabwe kikhoyera khwikalirwa, abadokanianga chinyuumba khulwo khwekesia ebiindu ebirakhoyera mbwe banyoole ebiindu mungira ye chisoni. ¹² Ne omuundu mulala khunibo yaboola ari, Bakirete ni babacha buli lwoosi, "khandi ni chisolo chimaanu, abo kuliira bakara." ¹³ Obuloli buno ni bwo bwadieri. Khulwako, nyoola khubalabira lukali, mbwe banyoole okhuba abaandu bo bwadieri mubusubiri, ¹⁴ ne baralondana nende chingano echia Bayaudi kose amalako ka baandu akabulamo obwadieri. ¹⁵ Ebiindu bioosi ni bilafu khu bala abali balafu: arali sibulao esindu silafu khu bala abakoyaana nende khurasubira, ne kata amakesi nende amapaaro kabwe kosi kakoyaana. ¹⁶ Beyamaanga khu minwa kiabwe mbwe bamanya Nasaye, arali mu bikhole biabwe nabio bamwekaana. Ni abaandu be bisinyisio, abarakhoyera mulikhuwa lilayi liosi liosi.