¹ Arali ewe nawe lomaloma amakhuwa kala akalondana nende amekesio ko bwadieri. ² mbwe abasaacha bakhuluundu babe nende sikero, abesiriibwa, abali nende obumanyirisi, abolerere mubusubiri, nende mubukheeri, nende mukhwesimirisia. ³ Khandi abakhasi bakhuluundu bosi bakhoyere okhuba nende ikhola yo butakatifu, baraba abokhukhikhirao, baraba abokhung'wa ifini yinyngi,arali babe abokhwekesia amakhuwa malayi, ⁴ mbwe bonyoole okhwekesia abakhasi abasiri abesikhana khukhera abasaacha babwe nende abaana babwe, ⁵ nende okhuba abo bumanyirisi, abalafu,abakhola mirimo bilayi munyuumba chiabwe, abokhuria basaacha babwe, mbwe likhuwa lia Nasaye liranyekwa. ⁶ Ne khandi kario abaraaga abe sisiani bosi bekesibwe okhuba abanyala okhweyimirira abene. ⁷ nawe ewe omwene obe esilolero esia bikhole bilayi mu makhuwa koosi, ne mumekesio kao wekesie bukololofu nende imbeera indayi, ⁸ nende amakhuwa ko bulamu karanyala khukhalakirwa mabi, mbwe ula okhayanga anyoole okhwambisibwa chisoni, khulwo khuba abula likhuwa libi elio khurulomalomakho. ⁹ Abakholi bakhoyere khuria abaami babwe, nende khubasangasia mumakhuwa koosi, nibarakalusania ninabo, ¹⁰ baraba abebi, arali bekesie obwesikwa bulayi bwoosi, mbwe banyoole khulolesia obulayi bwa mekesio kia Nasaye omuonia wefwe mumakhuwa koosi. ¹¹ Khulwo khuba obukosia bwa Nasaye obuonianga baandu boosi bwamala khwikulibwao. ¹² Ne burwekesianga okhukhaya mabi nende bwekoombi bwo musialo; mbwe khunyoole khumenya musikero, mubwadieri, nende bunasaye, musialo sia bulano sino, ¹³ nikhulindiriranga khunyoola linaaya liefwe, elie chikhabi nende khwikulirwao khwo luyaali lwa Nasaye mukhoongo, nende Yeso Kirsto omuonia wefwe. ¹⁴ Owerusia mwene khulwo khubeera efwe, mbwe arununule khurula mumabi koosi, nende khwelabisiria abaandu baye, abali nende sinani mubikhole bilayi. ¹⁵ Lomaloma makhuwa kano,dinyisia niwalaba mubunyala bwoosi. Ne omuundu yesi yesi arakhulekeresia khaba.