¹ Bulano, banabeefu, mukhusaayire, mbu elikhuwa lioMwami linyale okhutsia bwangu nende okhuchiingulwa, shinga olwa kali ninenyu, ² mana khunyale okhununulwa okhurula mubashimu nende abandu ababii, shichira boosi shibali nende obusubiri ta. ³ Halali Omwami nomusubirwa, owitsa okhubaheresia amani nende okhubalinda okhurulana nende omwonooni. ⁴ Khuli nende itswoni mumwami khuinywe, mbu mwesi mukhola khandi mulatsirira okhukhola amakhuwa akakhubalachirisia. ⁵ Mana Nyasaye yemirire emioyo chienyu mubuheeri bwa Nyasaye nende obwifiri bwa Kristo. ⁶ Bulano khubalachirisia, banabeefu, mulira liaOmwami wefu Yesu kristo, mulekhane nende omuheerwa yesi oubula shiakhola khandi oulamenyanga okhulondokhana nende emisiro chiamwanyoola okhurula khuifwe. ⁷ Khulwa enywe beene mumanyire mbu nobulayi okhweka okhurula khuifwe, shichira shikhwali nikhubula shiokhukhola olwa khwali ninenyu. ⁸ Shikhwaliakhwo eshindu shiomundu obularunga ta, halali khwakhola emilimo eshiro nende eshitere mubutsune nende okhutiiya, mbu khulaba omusiko khu mundu yesi ta. ⁹ Shikhwakhola kano shichira mbu shikhwali nende obunyali ta, halali khwakhola khuri kho khube eshilolero, mbu munyale okhweka okhurula khuifwe. ¹⁰ Khulwa likhwali ninenyu, khwabalachirisia, '' mbu oulenyere okhukhola emilimo alalia ta''. ¹¹ Shichira khuhuliranga mbu abandi muinywe nabatofu, abalakholakhwo omilimo kwosi ta,halali abeeyinjisinjia mukabeene. ¹² Bulano, abeeneyabo khubalachirisia nende okhubatinyisia muMwami Yesu kristo, mbu banyale okhukhalabana mubuhulerefu mana banyale okhulia omukate kwabo. ¹³ Halali enywe, baana beefu, mulatofule okhukhola amalayi tawe. ¹⁴ Khandi yesi oulaulira elikhuwa liefu mubarwa yiino, mumuyenjeresie khandi mulasanjirana ninaye tawe, kho anyale okhufimbibwa omurwe. ¹⁵ Halali mulamubukule shinga omusuku tawe, halali mumuhalabire shinga omuheerwa. ¹⁶ Bulano Nyasaye womulembe abaheeresie omulembe ebise biosi mutsinjira tsiosi. ¹⁷ Esie, Paulo, ehandika kano nende omukhono kwanje,eiri imbala khushiabuli ibarwa yehandika. ¹⁸ Obukosia bwoMwami wefu Yesu kristo bubeninenyu mwesi. Amina.