¹ Paulo nende Timoteo, abakholi ba Yeso Kirisito, khu batakatifu boosi mu Kirisito Yeso, abali Ebufilipi, nende abepisikoopi alala nende abasemasi: ² Obukoosia bube khweng'we nende okhurula khu Nasaye Sefwe nende khu Mwami Yeso Kirisito. ³ Ndebasianga Nasaye wange buli olwambechulira, ⁴ buli lwoosi mubuli malaamo kange khweng'we mweesi nisaba nende obusangaafu, ⁵ khulwo busangirani bweng'we muifanjili khurula inyanga yamberi okhuula bulaano; ⁶ ndi nende obwadieri musiindu siene sino mbwe ula owachaaka omulimo mulayi mweng'we anakuchiririsia okhuula inyaanga ya Yeso Kirisito: ⁷ Kori ngolwa kakhoyera esie okhupaara kano khweng'we mweesi, khulwo khubeera muli mumwoyo kwange, khandi nende mumboye Yange, nende mubulwaniriri, nende obuloleri bwe ifanjili, eng'we mweesi musangirane alala ninange obukoosia buno . ⁸ Okhuba Nasaye nomuloli wange, Kori ngolwa esie ndi nende amaofu khulweng'we mweesi mumwoyo kwa Kirisito Yeso. ⁹ Ne kano niko amalaamo kange, mbwe obukheeri bweng'we buchiririre okhwemeeda lukali, mumakesi alala nende bumanyirisi bwoosi, ¹⁰ munyoole okhufukirira kala akali malayi; mbwe munyoole okhuba nende emioyo milafu, nimubula elibi, okhuula inyaanga ya Kirisito; ¹¹ nimwichusibwemo ebiamo biobulungifu, khu luyaali nende ifuma ya Nasaye. ¹² Arali baana befwe, ndakha mumanye mbwe amakhuwa koosi akaanyoola kekholekhane khulwokhusalasia ifanjili; ¹³ kata buboye bwange bubonekhana mu kirisito, akari wa basikari, nende khubaandu boosi. ¹⁴ Ne obungi bwabaana befwe abo abali mu Mwami, bali nende ichuoni khulondana nende okhuboywa khwange, ne bachiririre khuyaali elikhuwa lia Nasaye nibabula oburi. ¹⁵ Abandi bayalaanga amakhuwa ka Kirisito mububacha nende buyingani; ne abandi nabo bayalaanga mulichoomo lilayi. ¹⁶ Abene abo bayalaanga khurula mubukheeri, nibamanyire mbwe esie ndarebwao mbwe nyoole khwemerera ifanjili; ¹⁷ arali abandi bayalaanga Kirisito khulwa buchunjubania, ne khasi ni khurula mumwoyo mulafu, nibapaara mbwe banameeda amanyakhano kokhuboywa khwange. ¹⁸ Bulano ni sina? Arali mungira chioosi, Kata nibili mububacha, kose nibili mubwadieri, Kirisito ayalwa; nange sangaalira eliene elio, khandi ndachiririra khusangaala. ¹⁹ khulwo khuba esie manyire mbwe kene kano kanakalukhana kabe obuonia bwange, khulondana nende amalaamo keng'we, nende obukhoonyi bwa Roho wa Yeso Kirisito. ²⁰ Kori ngolwa ndalindiririra lukali, nende khusubirira mbwe khasi njia okhwambisibwa chisoni khaba, arali muchwoni yoosi, Kori ngechinyanga chioosi, ne Kata bulano Kirisito anakingulwa mumubiri kwange, Kata nibili mubulamu bwange kose muliifwa liange. ²¹ Khulwo khuba khwesie okhumenya ni Kirisito, ne okhufwa ni ingaanga. ²² Arali nibili mbwe okhumenya mumubiri khwesie ni biamo biemirimo; bulano khasi manyire eliandalobola. ²³ Mbodokhanwe nende amakhuwa kabiri; ndekoomba khuchia okhuba nende Kirisito, khubeera nibilayi lukali; ²⁴ ari okhumenya mumubiri khwenyekhana lukali khulweng'we. ²⁵ Esie nisubiririra mukene ako, manyire mbwe ndamenya nende khuchiririra khuba ninang'we, mbwe munyoole khuchiririra khusangaala mubusubiri; ²⁶ mani muchiririre khusangaala mu Kirisito Yeso khulwokhubao khwange khandi alala ninang'we. ²⁷ Arali okhukeenda khweng'we khube kori ngolwa bienyekhana muifanjili ya Kirisito, mbwe ninjicha okhubabona, kose nindarabao, mbulire amakhuwa keng'we, mbwe mwemere sirungi mu Roho mulala, mumwoyo mulala nimulwanira obusubiri bwe ifanjili; ²⁸ ne muraria abasuku beng'we, mulikhuwa liosi liosi; khunibo esio nisilolero esiokhukora, arali khweng'we, ni silolero siobuonia, ne obwene obwo burula khu Nasaye. ²⁹ Khulwo khubeera mwaberesebwa khulwa Kirisito, naye khasi ni khulwo khusubira sa, arali alala nende khusandisibwa khulwa niye; ³⁰ nimuba nende obuyingani bula obwamwabona khwesie, nende khubulira mbwe siiri ndi ninabwo okhuula ebikha bino.