¹ Khubeera ndakha eng'we mumanye obunyakhani obwandi ninabwo khulweng'we, nende bala abali Laodokia nende abaangi abasiiri okhubona obweni bwange nende mumubiri. ² Mbwe emioyo kiabwe kinyoole okhulemisibwe, nibambaana alala mubukheeri, khandi mubuyiinda bwoosi obusubisia bwobumanyirisi, obwa makhuwa komubwefiso aka Nasaye, nende aka Kirisito, ³ Muniye echimbikhiro echiobumanyirisi nende amakhuwa kobukesi kakisibwamo. ⁴ Ne mboola kano mbwe omuundu yeesi arababachirisia nende amakhuwa akanyunyula. ⁵ Kata kario nindaraliwo mumubiri ninang'we, ndi alala ninang'we mumwoyo. Sangaala okhubona nende okhuba khweng'we mumbeera ikhoongo nende obukololofu bwo busubiri bweng'we mu Kirisito. ⁶ Ne ngolwa mwafukirira Yeso Kirisito Omwami, mukendere muniye. ⁷ Mudinyisibwe mubusuubiri nende okhumbakhibwa, kori nga mwekesebwa, nimumenyamo nende okhwebasia. ⁸ Mwekenderesie mbwe omuundu yeesi arabakosia nende amekesio kobubaacha khubirira mumilukha ekiabaandu nende amakesi kesialo sino, akarali aka Kiristo. ⁹ Muniye mulimo obwichufu bwa Nasaye obwamenya numbeera yomumubiri . ¹⁰ Ne eng'we mwolelere muniye, oli omurwe okwobunyali nende amaani. ¹¹ Muniye eng'we mwesi mwakhebwa nende esikhebo sila esirakholwa nende amakhono, nimwefwalula omubiri kwechimbi, mukhukhebwa mu Kirisito. ¹² Mwasiikhwa ninaye mukhubatisibwa khandi mwalamusibwa ninaye mubusubiri obukholwa nende Nasaye , owamulamusia okhurula mubafwa. ¹³ Ngolwa mwali abaafu muchimbi nende oburakhebwa imbeera yomubiri kweng'we, yabalamusia alala ninaye, nabalekhera echimbi chieng'we chioosi ¹⁴ Narusiao obwaandike bwamalako akali akulu wefwe, akali nikaingana ninafwe , nakarusiao mubweyaango, nakakhoma khumusalaba. ¹⁵ Namalire okhunyaasia obunyala nende amaani nabikhola esikhaya nasangalira obukhiri obwo khubirira khu musalaba okwo. ¹⁶ Bulano omuundu yeesi arabakhalakira mubiakhulia kose mubiokhungwa, kose mukhwechomia inyaanga, kose mumwosi muyaakha, kose khulondana nende isabato. ¹⁷ Akali esinikha esiamakhuwa keecha, okuli omubiri kwa Kirisito. ¹⁸ Omuundu yeesi arabanyuula esianwa mukhweduduya khwo khwinamira bamalaika niyengisia amalolo kaye omwene, niyelayira ebikhaya amakesi komubiri. ¹⁹ Naradirire omurwe,okwambania omubiri nende ebimeeka biakwo ebiambanisibwa alala nende obukhoongo bwa Nasaye. ²⁰ Nibili mbwe mwafwa alala nende kirisito, nimulekha amekesio kemilukha kiesialo, khu sina mwera khandi asi wamalako nga abo abasiri bamenya mukesialo . ²¹ "Oradirakho, orabilakho, orakiinga?" ²² Amakhuwa ako koosi kabiyaanga ebikha ebiokekhonyera; nimuloonda ebilagiro nende ameekesio kabaandu? ²³ Amakhuwa kabonekhana okhuba nende obumanyirisi mumbeera yokhwinamira eya mwekholera abeene nende okhuruka omubiri mubululu oburanyala ohkwikalira obwekoombi bwomubiri.