¹ Paulo, Silifano nende Timoteo khu likanisa lia Bathesolonike eliri mu Nasaye sefwe nende omwami wefwe Yeso Krisito; obukoosia bube khu eng'we nende omuleembe khurula khu Nasaye sefwe nende Omwami Yeso krisito. ² Khubiranga Nasaye orio buli lwoosi khulweng'we mweesi, nikhubarumbula muchisala chiefwe. ³ Nikhwichulisia emirimo kieng'we ekiobusubiri oburalekha khaba; nende obukhalabani bwo bukheeri, nende obwedemberefu bwe linaaya mu Mwami wefwe Yeso Krisito mumoni chia Nasaye sefwe. ⁴ Khumanyire abakheerwa bakoosi, okhulobolwa khweng'we nende Nasaye. ⁵ Khulwo Khubeera ifanjili yefwe khasi Yabechera mulikhuwa sa liong'ene khaba arali kata nende mumaani nende mumwoyo mulafu, nende obwesikwa buungi nga mumanyire mbwe khwali abaandu be imbeera sina khulweng'we. ⁶ Mani mwamala nimuba abalondi befwe, nende abo Mwami, nga mwanyola elikhuwa mukhusaanda khungi, nimuli nende obusangaafu bwo mwoyo mulafu. ⁷ Mani mwamala mwaba esilolero khu boosi mu Makedonia nende Akaya. ⁸ Khulwo khubeera elikhuwa lio Mwami liabulirikhana khurula khwengwe, ne khasi nimu Makedonia nende Akaya mwong'ane sa, arali buli abuundu. Lisuubira lieng'we khu Nasaye liabulirikhana. Khulwako khasi khukhoyere okhuboola esiindu siosi siosi. ⁹ Khulwo khuba abo bene bekesia kori ngo khwingira khwefwe mweng'we khwali, nende nga olwa mwakalukhanira Nasaye okhurula khu minasaaye nimurumikhira Nasaye mulala nende owo bwadieri. ¹⁰ Nende okhulinda Omwana waye okhurula mwikulu, owa yalamusia khurula mubafu, niye Yeso owa rununula khurula mulirima liicha .