¹ Leguchu ,ogas it sigikwok ing' kiptaiyat ; amu kararan nyito. ² Teech kwandang'ung' ak komet (nyito ngatutiet ni bo tai ni boto kayomiset), ³ si kobiit kararanit ing inye, si koto iwe keny ing' ng'weny. ⁴ Ak akwe, kwanisichu amotochotochi legukwok si konerkcho ago obai iche ing' kotigonet ak kateunetab kiptayat. ⁵ Otwogichu, ogas it iche chi kiptainikwok ing borto, ing' kaiyweisiet ak botanet, ing' muguleldo tugul ko u yo ogse it Kristo. ⁶ Ama ing' otwoknatet ni kirooe ko u chi iboiboi biko; ago kou otwogikab Kristo, oae magetab Jehovah ing' muguledo. ⁷ Oae boisiet ing' chomnyet, ko u ing' kiptaiyat ama ing' biko. ⁸ Onget ole kiy age tugul ni kararan ni aei chi tugul, kotun tooche nyoto kogeny ing' kiptaiyat ngo ratat nda ngotiagat. ⁹ Ak akwe kiptainichu, oachi iche ak akwe ko u nyoto omorasyini; onget ole mi kipsengwet kiptaiyandengwai ak ko nying'wong' ama mi ing' inendet kondit ni bo biko. ¹⁰ Nyibo let anyun, oegu chi kimen ing' kiptaiyat, ak ing' kimnatetab kamugennyi. ¹¹ Olaach karikab luget komugul chibo Jehovah, si kobiit omuch ogirinde kaberberisiekab chesawil. ¹² Amu ma bo kabelennyo bo ge borto ak korotik, ago bo latornatosiek, ak kimnatosiek ing' bounikab ng'wenyuni chi bo tuindo, ing' lugosiekab tamirmirikchi boyatiet ing' komoswekab kipsengwet. ¹³ Nyoto anyun onam karikab luget komugul chi boJehovah, si kobiit omuch ogerte ing' betut ni ya, ak yo kaoe tugul otononie. ¹⁴ Otononie anyun ,ko kaogermen suenutikwok ing' imanda ,ak ko kaolaach kametab teget ni bo imanda, ¹⁵ ak ngo kaoratyi kelyekwok bekyinet ni bo logoiywek chi kororon chi bo kalyet; ¹⁶ ak onam koboto chun tugul long'etab kayanet ,ni omuchi omise kotiek tugul chi bomat chibo inendet ni ya ¹⁷ Ak onam kutwetab yetunet, ak rotwetab chok ni bo tamirmiriet, nyoto ng'olyotab Jehovah. ¹⁸ Osa betusiek tugul ing' Tamirmiriet koboto saet tugul ak kagaigaet agobo tugul chi tililen. ¹⁹ Ak agobo ane, si kobiit kegono twegunet ayat kutinnyu abarta ing' nyiganatet ung'otiet ni bo logoiywek chi kororon. ²⁰ Amu a i tononjinindet nibo ni bo nyoto ing' sirimwek; si kobiit ang'alal ing' choto ing' nyiganatet, ko u yo nyolu amwa. ²¹ Ago si kobiit onai ak akwe ng'alekyu ,ole ateptoi , komwowok tuguk tugul tukiko ,chamanet ni ketupche ni kiboitiot ni kiyoni ing' kiptaiyat. ²² Ni koayokwok agobo ng'olyondonito si kobiit onai ng'alekyo, ak kogaigai inendet mugulelwekwok. ²³ Ng'otebi kalyet koboto tupchosiek, ak chamnyet ak kayanet chi bunu Jehovah Kwanda ak kiptaiyat Jeiso Kristo. ²⁴ Ng'otebi karannindo koboto iche tugul chi chame kiptaiyandennyo Jeiso Kristo ing' atepto ni mo ng'emokse.