¹ Oegu anyun rubikab Jehovah, kou leguk chi kichome; ² ak obendate chamnyet ko u yo kichomok Kristo agine ak kogoitoge agobo ache koek kagochinet ak tiseiywot ing' Jehovah ni ng'uu ni nyamdut. ³ Ago ko u yo nyoljini biko chi tililenko matong'alale ing' kwenung'wong' sokset, ak sumto tugul nda kasetab miat; ⁴ nda tewernatet, nda ng'alaletab sulwontit nda roriot ni bo ng'alek chi yaachen, manyolu choto ago kaigai kagoitoetab kongoi. ⁵ Amu onget nyito iman ole, mami chi ni sokse nda chitab sumdo nda kose miat nyoto ni sae kanamonik, mami ing' chu ni nyoru borotet ing' bounatetab Kristo ak Jehovah. ⁶ Ama tu kenak chi ing' ng'alek chi manamege ak kiy; amu chonjini nereknatet ni bo Jehovah ngelelnnatet amu tupcho. ⁷ Nyoto anyun amoe amdaet agenge ak iche. ⁸ Amu kio tuindo ing betusiek alak, ago o lapkeiyet raa ing' kiptaiyat; obendate ko u legukab lapkeiyet. ⁹ [Amu logoiyatab lapkeiyet ko ing' kororindo tugul ak imanda ak imanit]. ¹⁰ Si onai nyoto toochokse ing' kiptaiyat; ¹¹ amoe amdaet ak boisionikab tuindo chi matinye logoek, ago kaigai oger kong'. ¹² Amu tukuk chi aei iche ing' ung'ot ko tewrnat ngelin kemwa. ¹³ Ago tuguk tugul chi kigere kong' ko ng'ang'akse ing' lapkeiyet amu kiyage tugul ni kibortoi ko lapkeiyet. ¹⁴ Nyoto anyun, mwoe inendet kole kosu inye ni irue, ak ing'eet ing' chi kigobek, ak kogewnyin Kristo . ¹⁵ Oripge anyun mising ing' ole oteptoi ing' banwekwok, ma ko u chi ma ng'omen ago ko u chi ng'omen; ¹⁶ oboisie saisiek komie, amuyaachen betusiek. ¹⁷ Nyoto anyun amoberberitu, ago oguiye kito ni u magetab kiptaiyat. ¹⁸ Amato bogitye ing' maiyek, chi ibu maget ni ya, ago ngonyiak Tamirmiriet. ¹⁹ Ong'ololjinige ing' tienwogikab kolosunet ak tienwogik ak tienwogikab tamirmiriet, otieni tiendo ni rure ing'mugulelwekwok ing' kiptaiyat; ²⁰ ogoite kongoi kotugul agobo tuguk tugul ing' kainetab kiptaiyanennyo Jeiso Kristo, ogochini Jehovah inendet kwanda. ²¹ Oming'injige ge ing' kaiyweisietab Kristo . ²² Osotichu, ogas it maning'otaikwok, ko u yo ogose it kiptayat. ²³ Amu maning'otiot ko matitach osotiot, ko u Kristo agine ni metitab kaniset, inendet yetindetab borto. ²⁴ Ago ko u yo kose it kaniset Kristo ko u nyoto agiche osotik ing' maning'otaikwok ing 'kiy age tugul. ²⁵ Maning'otoichu, ocham osotiwok ko u Kristo agine ni kicham kaniset ak kogoitoge agobo inendet. ²⁶ Si kobiit kotoben ko kagotilil ing' kaunetab beko ing' ng'olyot. ²⁷ Si kobiit komutyige kaniset nyoto ni bo toroonatet ni matinye kunenden nda siring'ut nda kiy age tugul niu nyoto; ago koek ni tililni ni matinye tisia. ²⁸ Ko u nyoto kanyolji maning'otaik agiche kocham osotikwok ko u yo chome borwekwok ichege; inendet ni chame osotiondennyi kochomege inegei. ²⁹ Amu mami chi ni sose bortonyi; agobae ak koribe ko u kito ni yochin Kristo agine kaniset; ³⁰ amu ki kebeberwek chi bo bortonyi. ³¹ Amu ng'olyondeni, kobagaktoi chi kwandanyi ak kamet ak konamge ak osotiondenyi; ak koek icheget tuwai borto agenge. ³² O ung'otioni ago ang'ololi agobo Kristo ak kaniset. ³³ Ago ngochom chi age tugul osotiondennyi, kou ole chomdoge; ak ngogonyit osotiot maning'otiondennyi.