¹ تا ئێستا بەڵێنی چوونە ژوورەوە بۆ پشوودانی خودایی ماوە، با بترسین: لەوانەیە دەرکەوتبێت کە هەندێکتان شکست بێنن لە چوونە ژوورەوە. ² چونکە موژدەی بەڵێنەکە بە ئێمەش گەیشتووە، هەروەک چۆن بەو گەلە گەیشت. بەڵام موژدە بەهیچ شێوەیەک سوودی نەبوو بۆ ئەوانەی بیستیان، چونکە ئەوانە پێشتر ڕەتیان کردەوە باوەڕی پێبهێنن. ³ ئێمە کە باوەڕمان بەم موژدەیە هێنا، دەچینە ناو پشوودانی خودایی. لەبارەی ئەوانەی باوەڕیان نەدەکرد فەرمووی: « بەم شێوەیە، لە تووڕەیی خۆمدا، سوێندم خوارد و گووتم: ناچنە شوێنی پشووەکەم!» ئەم پشووە لەو کاتەوەی خودا بناغەی جیهانی تەواو کرد ئامادەیە. ⁴ لە شوێنێکدا لە پەرتوکەکەدا ئاماژەی بە ڕۆژی حەوتەم کردوە: «پاشان خودا لە ڕۆژی حەوتەمدا لە هەموو کارەکانی پشوویدا». ⁵ پاشان گەڕایەوە و فەرمووی: ناچنە ناو شوێنی پشووەکەم!» ⁶ بەم شێوەیە ڕوونە، کە پشوودانی خودایی چاوەڕێی ئەوانە دەکات کە دەچنە ناویەوە. ئەوانەی بۆ یەکەمجار مژدەی ئەویان پێگەیشت بەهۆی یاخیبونیانەوە نەچوونە ناویەوە، ⁷ خودا دەرفەتێکی نوێی ڕاگەیاند، فەرمووی: «ئەمڕۆ» لە دوای ماوەیەکی دوور و درێژ لە گووتنی ئەمە لەسەر زمانی داڤید، فەرمووی: «ئەمڕۆ، ئەگەر گوێت لە دەنگی بوو، دڵتان ڕەق مەکەن». ⁸ ئەگەر یەشوع گەلەکەی بهێنایەتە ئارامییەوە، خودا دوای ئەوە باسی بەروارێکی نوێی بۆ چوونە ژوورەوەی نەدەکرد بە گووتنی: «ئەمڕۆ». ⁹ بۆیە تا ئێستاش پشووی ڕاستەقینە بۆ گەلی خودا ئامادەیە. ¹⁰ ئەوەی بچێتە ناو ئەو پشووەوە، لە کارەکانیشی پشوو دەدات، هەروەک چۆن خودا لە کارەکانی پشوویدا. ¹¹ لەبەرئەمە، با هەموومان هەوڵبدەین بچینە ناو ئەو پشووەوە، بۆ ئەوەی هیچ کام لە ئێمە وەک ئەوانەی سەرپێچی فەرمانی خودایان کرد نەکەوین. ¹² لەبەر ئەوەی وشەی خودا زیندوو، و کاریگەرە، لە هەموو شمشێرێکی دوو لێوار تیژترە، بۆجیاکردنەوەی ناخ و گیان، جومگەکان و مۆخی ئێسکەکان، توانای جیاکردنەوەی بیرکردنەوە و مەبەستەکانی دڵی هەیە. ¹³ یەک بەدیهێنراو نییە لە چاوی خودا شاراوە بێت، بەڵکو هەموو شتێک ڕووت و ئاشکرایە لەبەردەم چاوی ئەودا، ئەوەی هەژماری خۆمانی دەخەینە بەردەست. ¹⁴ چونکە سەرۆک کاهینی مەزنمان هەیە کە بۆ سەرووی ئاسمانەکان بەرز بووەتەوە، ئەوەش یەشوای ڕۆڵەی خودایە، با بەردەوام پابەند بین بە دانپێدانان بەو. ¹⁵ لەبەر ئەوەی سەرۆک کاهینمان بێتوانا نییە لە تێگەیشتن لە لاوازییەکانمان، بەڵکو ئەویش تاقیکراوەتەوە، بەڵام ئەو بەبێ گوناهەبوو. ¹⁶ با بەمتمانەوە لە تەختی بەخششی نزیک ببینەوە، تاکو بەزەیی بەدەست بێنین و بەخشش بدۆزینەوە بۆ یارمەتییمان لە کاتی پێویستیدا.