¹ ئەمە ڕاسپاردەی منە بۆ ئەو پیرانەی کە لە نێوتاندان، وەک پیرێکی هاوڕێ بۆیان، شایەتحاڵی ئازارەکانی مەسیح و هاوبەشی ئەو شکۆمەندییەی بن کە ئاشکرا دەبێت: ² مێگەلی خودا بلەوەڕێنن، کە لە نێوانتاندایە، وەک چاودێر، نەک وەک ئەرک، بەڵکو بە خۆبەخشییەوە، وەک خودا دەیەوێت، نەک بۆ دەسکەوتی نابەجێ، بەڵکو ئەو خزمەتە بە پەرۆشی و ئارەزوومەندانە بێت. ³ خۆتان زاڵ مەکەن بەسەر ئەو مێگەلەی خودا پێی سپاردوون، بەڵکو پێشەنگ بن بۆیان. ⁴ هەروەها کاتێک سەرۆکی شوانەکان دەردەکەوێت، تاجی شکۆمەندی وەردەگرن کە هەرگیز لەناو ناچێت. ⁵ کەواتە ئەی گەنجان، ملکەچی گەورەکان بن. هەمووتان لە مامەڵەکردن لەگەڵ یەکتردا بەرگی بێفیزی لەبەر بکەن. چونکە خودا دژایەتی لووتبەرزەکان دەکات، بەڵام بەخشش بە سادەکان دەبەخشێت. ⁶ کەواتە خۆتان لە ژێردەستی بە هێزی خودا بێ فیز بکەن تا لە کاتی خۆیدا بەرزتان بکاتەوە، ⁷ قورسایی هەموو نیگەرانییەکانتان بخەنە سەر ئەو، چونکە گرنگیتان پێ دەدات. ⁸ ژیر و وریا بن. شەیتانی دوژمنتان وەک شێرێکی بەنەڕەنەڕە، بەدوای نێچیردا دەگەڕێت بۆ ئەوەی قوتی بدات. ⁹ بۆیە بەرەنگاری ببنەوە، لە باوەڕدا چەسپاو بن. بیر لە براکانتان بکەنەوە کە لە سەرانسەری جیهاندا بڵاو بوونەتەوە بە نێو ئەو ئازارانەدا تێدەپەڕن. ¹⁰ دوای ئەوەی بۆ ماوەیەکی کورت ئازارتان چەشت، خودا، کە خودای هەموو بەخششێکە بانگتان دەکات بۆ ئەوەی هاوبەشی شکۆمەندییە هەتاهەتاییەکەی بن لە مەسیحدا، وادەکات کامڵ و چەسپاو بن و بە هێز ڕەگتان دادەکوتێ. ¹¹ هەموو شکۆمەندی و دەسەڵاتێک بۆ ئەوە هەتاهەتایە. ئامین! ¹² بە دەستی سیلڤیانۆسدا برای دڵسۆز ئەم کورتە نامەیەتان بۆ دەنێرم. مەبەستم ئەوەیە کە ئامۆژگاریتان بکەم و شایەتیتان بۆ بدەم کە ئەو بەخششەی کە چێژی لێ وەردەگرن بەخششی ڕاستەقینەی خودایە کە ئێوە تێیدا چەسپاون. ¹³ لە بابلیشەوە، ئەوەی خودا لەگەڵ ئێوەدا هەڵیبژاردووە سڵاوتان لێ دەکات، و مارکۆسی کوڕیشم. ¹⁴ بە ماچێکی خۆشەویستی سڵاو لە یەکتر بکەن. ئاشتی بۆ هەمووتان بێت ئێوە کە لە مەسیحدان.