Sura ya 4

1 Mulepolehenche elimenyu ele, mwe senga incha Bashani, yomwe mlemufyamba ifya Samaria, yomwe mukhovasyova avaganchu, yomwe mukhovatikha avanogwe, yomwe mukhovavola avagosi venyo, "Mutugegelage ifyakhunywa." 2 Untwa Yahwe edyegile khuvuvalanche vwa mwene, "Lola, amachuva agikhwincha kholyomwe valavakhencha khu ndovana, nu khuvusililo wenyo ni ndovana inchakholovela isomba. 3 Mlakhomela pakho pabomoliwe mu nguto incha khelunga, khela munu venyo ilotaga khwa khugendela apabomoliwe, pwu mlelakhel khu Harmoni -vwu inchova uYahwe." 4 "Mlotage khu Betheli nu vwuvivi, khu Gilgali mukhungelencha inongwa, mgegage esadakha panavusikhu, izakha vwu galutile amanchuva gadatu. 5 Mulakhage esadakha eye khusana paninie nu nkate; mupangage esadakha eya khwekhumia; vapangelage, ulwa khuva yoyikhong'ovosya mwe vanu va Israeli -vwu inchova uYahwe. 6 Nikhovapa uvwuvalanche uvwa mino mu mbutamo vwenyo nu khuva vovole emikate mu mbunchenge vwenyo, samuvuyile khulyone, vwu inchova uYahwe. 7 Pwu nesigile efula khulyomwe vwu gesigile emienchi gedatu ukhubena, nekhayevekha yetime dalagadalaga, uluvafu lomo ulwa khelunga yatimile, nu uluvafu alonge olwa khelunga sayatime khukhava khulagafu. 8 Vanchongolile ifilonga fivele ama fidatu ukhuluta ekhelunga ekhenge khwinywa amagasi savakhakwila. Savakhungilivukhila one inchova u -Yahwe. 9 Nevatovile khu khetamu ikipela ukhuniala. Owingi uvwa madovela, ifyalo fyenyo ifya zabibu, emitini nchenyo, ne mizeituni gekhuma gyoni. Samukhangilivukhila vwu inchova u Yahwe. 10 Nesukhile etauni khulyomwe ndava Misri. Nevabudile avana venyo khu mundu, ukhugega ifarasi nchenyo, nu uvwunchenge wenyo vunukha mumula nchenyo, samukhang'ilivukhela, inchova uYahwe. 11 Neyanchinie ifilunga, ndu unsekhe u Nguluve opoanyanyelile e Sodoma ne Gomora. Mweve nde khesikhi ekhepembiwe ukhuhuma mu mwoto. Samukhang'ilivukhele - inchova uYahwe. 12 Pwu yanivomba ekhenu ekhevwi khulyove, Israeli, ulwa khuva yanivomba ekhenu ekhevivi khulyove, wetesanie ukhwagana nu Nguluve, Israeli! 13 Ulwakhuva, lola, uvei khovitesania ifyamba veyoywa ipela emepo, ikhogubatwela amasage aga mwene o-munu, ipela panavusikhu ukhuva chisi, nu khupakanya pakyanya pakhelunga. Yahwe, Unguluve va khapuga lyo litawa lya mwene."