1 Ndiseega kubha mungigumirirye na neenye kubhugege bhwane. Nawe kwoobhuheene mringumirirania nanenye. 2 Kwookubha niwe rihari kwuneemwe. Kweemira narageni na neemwe bhoobhuteetwa bhoomusubhe wumwe. Nkabharaga kubhareta emwe kuu Kristo kyawuno omuzomu akyari kumenyana no omusubhe. 3 Nawe ndobhoha kubha kyego, nkye enzoka kyego yamung'enererye Eva kwookubhung'eni bhwaye, amiseegogenyu garanagya okubhuribhwa kureka kuumasabhi obhkeene noobhuzomu ku Kristo. 4 Kuuriono kwookutubhania omutu omurebhe akaza nookubhabhura Yeesu owundi agari no wuurya tubhabhuriri. Hamwe kwookubhtubhania kubha mukagega ekoro eyindi hagari naa wurya mwagegiri. Hamwe kwookutubhania kubha mukagega ekina ekindi hagari naayirya mwagwatiriri. Muukigumirirya amang'ana gayo bhuuzomu eriisa? 5 Kuugayo ndisega kubha enye gati muubhano bhari mukyaro kubhayo bhakibhirikirwa abhabhgati abhazomu. 6 Nawe hatenye nitegirie gati kurusha amakerenio niteri ego gatigati kumang'eni. Kuukiryana gatigati wamang'ana gosi turikoriri rino kumenyekana kwenyu. 7 Heene nikakora amabhihu kwookwihombahomba omweneego emwe muniage kugororokibhwa? Kuu kuno nikakerenia kukutazurwa ekina kyee Eryoobha kuunebhwe. 8 Nikarusha amasengerero agandi kwookugwata okusakiribhwa kurwa kunebho kubha ninganiagirye kubhahokerya emwe. 9 Eribhaga niarina nemwe niabhaga gatigati woobhwendi, nitamugwereri wuuyo woosi. Kweego kubhino okwenda enyebhisirwe na bhahiri bhano bhiziri gatigati wa Makedonia. Gatigati weekira ekigiro niribhiri omwene kutamakubhqa murigo kuumwene, ndagendererya kukora bhuyo. 10 Aribha hene yee Kristo irimwisi wane, ennkwikumia kwane kutakuja kukiranibhwa gatigati orubhara rwa Akaya. 11 Kwaki? Kumang'ana nitabhasegiri? Eryoobha rimenyiri nibhasegiri. 12 Nawe kiirya kino nikukora, nirakokira nawe. Nirakokora kwookubha ninagye kuribhira omweya gwaabharya bhakugongerya omweya gwookubha kyeego turi gatigati wa kiryakirya okwihemera. 13 Kuugayo abhatu bharya niabhabhagati bhoorubhehi niabhakori bheemirimo abhang'enererya. Bharikyosya abheenego kya abhabhagati bhaa Kristo. 14 Na rino ritakudungurya, kuugayo neerisambwa obhona ririkosya erinego kyaa Maraika woobhweru. 15 Yino etana kiruguro kikuru kyeego abhakori mirimo bhaaye bhoosi bhaarikisya bhaeenego kyaa abhakori bheemirimo bheeheene. Amisego gabhu eribha kyego amatemio gabhu kyeego gakwenderwa. 16 Ndabhuga bhoono atabhaho muutu wuuyo woosi akwisega enye ni mutamutamu. Nawe eribha murakora, muugwatire kyo omutamutamu ninagye kwiikumia. 17 Kirya kino kikubhuga kikunitunia eno okwisiga kwookwiheeme kutakusinzirwa na Taatabhugya nawe amakerenio kyaago mutamutamu. 18 Kuubhurya abhatu bharu bhakwihema kweetemwa yoomubhiri nirihema kweki. 19 Kwookubha mukagegerana kwoobhuzomererwa na bhatamutamu, omwe abhene munamisego? 20 Kwookubha muragegerana noomutu kyeego akukutura muubhubhagati, kyoo kumukorera obhutwani kani gati yenyu, kyeego arabhatumanie emwe kuubhwera bhwaye, aribha aritura iguru kuubhukama, hamwe kyeego arabhateme mubhusho. 21 Ndahaya kwezisonizietu kwookubha etwe twabhanga noobhunyaku bhukong'u kukoraego nieno tukyari kyeego wuuyo woosi akwihema ndakerenia kyoomutamutamu enye kweki ndiehema. 22 Awe, abho no Abhayahudi? Na enye niigo? Awe, abho no Abhaisraeri? No enye niigo? Awe, ego bhayo nibhibhurwa bhaa Abrahamu nanienye niigo? 23 Awe, bhayo niabhahokya bhaa Kristo? {Ndakerenia kama ni bhururu kirwe noobhwongo bhwane.} Enye niiguru. Niibheri mumahokya amakong'u iguru bhukong'u kure bhukong'u yookubha mubhiobhohe gatigati wookutemwa kuhita kuurengwa gatigati wookugumirirya enzinyako nzaru zooruku. 24 Kuurwa kuubhayahudi nigwatiriri mara katano "Matemo mirongo eno kurushaho rumwe." 25 Mara katatu nikatemwa kweehimbo. Mara rumwe niakatemwa amagina kwa katatu nikahona kuu meri. Niakoreri obhutiku noo mwisi gatigati weenyaraza mwasi. 26 Nibheri gatigtai weezing'endo zee kiraka kwekiraka, gati weezinyako za abharusya bhyeebhigiro bhyaabhatu kwaamanaga gati weenyako kurwa kubhatu bhane omwe ne, gati yeenyako kureka kuubhatu bhyeebhyero gati yeenyako yaamanzi, gati yeenyako yee nyanza, gati yeenyako kureka kubhahiri abhabhehi. 27 Nibheri gati weemirimo emikong'u gati woobhwikari obhukong'u gati woobhutiku obhwareu wookutama okuhindira, gati weenzara neenyako, mara karu gati gati wookubhohwa gati wembeho neeking'ahi. 28 Kure neebhigiru bhindi kureho okusingiriribhwa kuukira orusiku iguru waane woobhwobha bhane kumaseng'erero. 29 Wewi noomunyaku, naneenye nitari munyaku? Wewi akoriri owuundi ngugwa kumabhihu, ne nenye nitakurugura mwoosi? 30 Aribha ni kuhatikwa niheme, ndihemera kukirya kino kikuerekya obhutobhu bhwane. 31 Eryoobha na Taata wa Taatabhugya wa Yeesu, ewe wuno okugungibhwa kiraka amenyiri kubha enye nitakung'enererya. 32 Eryaa Dameski, omukuru woomukowa iyasi yoo mufarme Areta yabhanga araguribha omugye gwaa Dameski bhaze bhagwate. 33 Nawe nikaturwa msakwa, kuhitira eribhaga kuunyiki nanikahona kureka mumabhoko gani.