Ekiseku 10

1 Enyee Pauro, omwenego ndabhakumirirya mwihombhe no obhunyohu bhwa Kristo. Enye ni munyohu kwibhaga nirikubhukangati bhwenyu nawe ninobhusubhe subhe kweemwe kwibhaga rino rikubha kure na neemwe. 2 Ndabhasabha emwe kubha, iribhaga rino ririho hamwe naanemwe, ritakwenda kubha msubhe subhe, nookwisega nditegerera, ndaaza kwenda kubha msubhe subhe kwiibhaga nikubhaahakania bharya bhakwisega kubha rurikara kweetewa ya mubhiri. 3 Kwookubha niigo tungabha turagenda gati woomubhiri, tutakurwana erihi, kweetemwa yoomubhiri. 4 Kwookubha ebhikwati bhino tukuhokerya okurwana bhitari bhoomubhiri. Noomweya gwaye bhinezinguru zyee Eryoobha ryookusarya ezinyiki zirarushaho hene amakerenio gano gakubhurya amakerenio. 5 Hene, turasarya bhoosi bheene managa kino kikwigororokya kumang'eni gyee Eryoobha turarikora, okusarya emitegerero gati gati woobhusski kuu Kristo. 6 Na turanyora bhwahene bhookutema amang'ana gano gatana obhusuki, obhusuki bhwenyu nobhukubha bhubheri, bhwahene. 7 Rora kirya kino kirimwasi kubhukangati bhwenyu woosi arang'enererebhwa kubha nii waa Kristo, tiga ahituke ewe omwene ku ha kyeego ari niwaa Kristo, bhuyo nibhwe bhwoosi turibhuyo. 8 Kuugayo noosi niriheme bhukong'u kuubhunagya bhwetu bhuno Taatabhugya akarusha kweetwe kubhombokera neetari kubhasarya, nitakurora soni. 9 Nitakwenderwa rino rirorekane kubha ndabhakanga emwe kumahityo gane kwaabhu. 10 Kubhurya abhatu abharehe bharabhuga, "Amahityo gaye ni mahari genezinguru, nawe kumubhiri ewe nio munyaku mang'ana gaye gatakuzoma kwitegererwa." 11 Bhoono kubhatu bhwetemwa yino bhamenye kubha kirya tukuhaya kuumakamokwibhaga turikure, niibhwaheene na bhurya turakore kwibhaga rino turabhe harya. 12 Tutakugya kure bhkong'u kyookwikumania hamwe okwiringania ebhooabheene na bharya bhano bhakwikumia abhene. Nawe hano bhakwirenga abhene kuwuumwe wabhu, bhatana bhongo. 13 Etwe, hatego tutakwihema kuhita kurutunga omweya gwaye, turakorabhuyo turimwosi woorutunga gino Eryoobha rituryengere, ezitunga zino zikuhite kure kyeego orweenye ruri. 14 Kuubhuyo tutiyahuruhirye abhene hano twabhahirikirirye abheene. Tutabha bhobhutangi kuhika kure kyeego obhwenyu kukina kyaa Kristo. 15 Tukyari kwihema ezitunga kumirimo gyabhandi. Omweya gwaye turaganyirira kuubhikirya bhwenyu kyaabhurya bhukukina erikwa ryeeturye mirimo rita kuribha bhukong'u, na hakyari mwoosi woorutunga rwabhwaheene. 16 Turaganyirira kuurino kwookubha tunagye kukerenia ekina tee na mumikoa iguru wenyu. Tutakwiheema kuumirimo gino gikukorwa gati wwe zimbara ezindi. 17 "Nawe woosi omwihemi yiheme gati waa Taatabhugya." 18 Kwookubha atari wuurya yiruzi woobhuheene omweene aruzibhwe woobhuheene. Nookubha, ni wuurya wuuno Taatabhugya amuruzi ni wabhuheene.