sula ja 3

1 Iga kulikaaja lino ligalwike ! ilikaaja ilinyamatingo linajisivue. 2 Nulyalipulike ilisio lya Nguluve, nambe nukuupile sino ghugholosivua kuhuma kwa Yahwe. Nukamuhuvile uYahwe kange naikumvelelela uNguluve ghwake. 3 Avatua vake ve vanyalupala vano viguluma nkate javo. Avalamuli vave seng'ekeva sa pakivwilile sino nasisighasia kimonga kino kiliva kimung'unywike ilwakilo jino jikwisa. 4 Avavili vake vanyamatingo na vaghosi vahendani. Avatekesi vake vapanyasisie pala pa vwimike kange vananginie indaghilo. 5 UYahwe ghwenyakyang'ani muvene. naikagula kuvomba amakole. ilwakilo soni ikwimila ikyang'ani jake! najilifisika mulumuli, nambe ndikio avaanhu avasila kyang'ani navikagula kuvona soni. 6 Ninanginie ifipelela amalinga ghave ghanangisivue. nighavikile amapulo ghave mapagale, pe lino nakwale nambe jumo junoikilila kwamwene. amapulo ghavo ghananging'ine pe lino nakwale juno ikikala nkate jake. 7 Nikajova , 'kyang'ani mulikunyoghopa une. mupilaghe imbulanisio ingolofu kange muleke kudumulivua kutai kuhuma mumapulo ghinu ku ghoni ghala ghano nivele nilinganisie kuvomba kulyumue.' neke valyale nulunoghelua lwa kunangania amaghendele ghavo ghoni ku fighono fyoni. 8 Pe lino munighulaghe - ulu lwe lujovo lwa Yahwe kuhanga ikighono kino nilikwima vwimila vanovalemasivue. uvulamusi vwango kukong'ania ifipelela, kukuvukong'ania uvutwa, nakukung'a kuvanave ilyojo lyango, uvupafi vwango vwoni vukali, iisi ijio jooni jiligulubikwa kwa mwoto ghwa lyojo lyango. 9 Apuo penikuvapelagha amalomo amanofu, kukuvakemela vooni kulutavua lya Mutwa kukunivombela vikwima pepamo. 10 Kuhuma kumwambo ghwa kikogha kya Esiopia vano vikufunya kulyune vano vaghavinie viletagha amatekelo vwimila une. 11 Mukighono ikio namulavikua kuvudesi kumbombo sinu sooni sino muvombile vwimila, une, kutengulila unsiki ghula nivusiagha kuhuma kulyumue vala vano vasejagha muvuvagha vwango, nakange ulwakuva namuliva nunsiki ntali mulyakuvomba amatingo pakidunda kyango ikyimike. 12 Looli penikuvalekagha hwene vanhuu va paasi kange hwene vaanhu vamofu, kange mulipata apakukimbilila kulitavua lya Yahwe. 13 Ghwejuno ghukukala muisilaeli nansiki ntali naghuvombagha uvuhosi nambe kujova uvudesi, kange kusila lulimi lya vusyangi luno lulivoneka mumulomo ghwako; pe vililisia na kughona pasi, kange nakwale nambe jumo junoilikuvavika mwoghope." 14 Imbagha mwalive Sayuni! jeghelagha ghwe isilaeli. Muhovokaaghe na kululutila ku mwojo ghwako ghwoni. minja ghwa Yelusalemu. UYahwe avusisie uluhigho lwako; avadghile kutali avalugu vako! 15 uYahwe ghwe Mutwa ghwa Isilaeli mu lyumue. Pe namulikumwoghopa kange umuhosi! 16 Mufighono ifiyo vilijova kwa Yelusalemu, "nungoghopaghe, Syoni. nungaghalekaghe amavoko ghako kuva malegefu. 17 UYahwe Nguluve ghwako alipakate palyumue umunyangufu va kukuvapoka. iliseja pa lwinu namulukelo ivisagha kimie kulumue mulughano mwamwene. Ivisagha nulukelo kulyumue kange ilulutilagha nulukelo, 18 Mukighono ikivikua ikya luhovoko. nilivusia ifua kuhuma kulyumue; nansiki ntali namupindagha isonisake sihambwike sive luaghinio mu iisi jooni. 19 Loolagha, nilutang'anie pikuvavombela avalugu vinu voni. amasiki ghala, nikuvapokagha vano vakunilue napikuvakong'ania vano valyataghilue patali. nikuvavika lughinio kange nighambusiagha isoni save sihambuke sive lughinio muiisi jooni. 20 Mumasiki ghala nikuvalongosiagha mumasiki ghala nikuvakong'aniagha palikimo. nikufivikagha ifipelela fyoni fya mu iisi pikuvoghopa napikuvaghinia, amasiki ghano mukusaghagha isio nivisagha nivagomwisie, " fye ijova uYahwe.