Isura 5

1 Niwo niniinduka, nindalamila, nindola, echitabho nichiguruka mulutumba! 2 Malaika nabusha echo nalola. Nimusubhya ati, Echitabho nichiguruka mulutumba ; chili no obhulela bhwa ebhita bhitanu no obhugaji bhwa bhita bhisatu. 3 Namala nambila ati, " Muchitabho omwo lyandikilwemo lifume linu liligwata echalo chona. Olubhaju lumwi lwe echitabho olwaika ati bhuli mwifi aliusosibhwamo muchalo; no olubhaju lundi nilwaika ati bhuli munu unu kaika olulimi atasikene no omulai gwaye ona alibhilimibhwa. 4 Omukama wo obhuinga kaika ati alituma echimo, na chilingila bhuli musi gwo omwifi na munyumba ya bhuli munu unu kaika olulimi kenu asosishe omulai. Echiimo chilikala mumisi jebhwe nchisaga chibhanyamuye." 5 Malaika nabhoneka lindi naika ati, " Lola! Echinu chindi ona chaja!" 6 Nimumbusha ati, " Nichinuki echo?" Nasubhya ati, "Nichikapo, echilwamilila echibhibhi che echalo chona." 7 Echikapo chili na lifundikililo likonjelwe na libhati. Nejile niketegelesha, lifundikililo nilimusibhwa, muchikapo omwo alimo omugasi eyanjilemo. 8 Malaika naika ati, " Omugasi unu alikulubhaji lwo obhunyamuke." Niwo namusindika Omugasi oyo emwalo ye echikapo na nasubhyako lifundikililo. 9 Nindalamila nindola abhagasi bhabili nibhaguluka okunyijako kwa jimbabha ja amanaga lweje nyamunkondo. Abhagasi abho nibhabhatula echikapo nibhachilasa kula. 10 Nimubhusha malaika ati, " Abhachisila akiechikapo echo. 11 Nansubhya ati, " Abhachisila Bhabhulonia, eyo niyo bhalichumbakila lisomelo lyacho. Lisomelo likamala okumbakwa, echikapo echo chilitebhwa ao nibhachilamya."