1 Nuwijuke Yahwe, ganu gachibhwene ulole jinswalo jeswe. 2 Omwandu gweswe gwainduka okubha bhinu bhya abhagenyi. 3 Chabha lwa abhasigwa, bhanu bhatali na bhesemwene, na bha mayi bhali lwa abhagasi abhasigwa. 4 Ni bhubhusi echiliila jipilya amanji ganu echinywa na echiliila jimbao jeswe jimpilya. 5 Mbabho abhaja kwiswe, bheliye inyuma yeswe; chaigilwe chitakubhona ebwisisho bhwo omwoyo. 6 Chagendele Misiri na Ashuru. okusabhilisha ebhilyo bhyo kuchiya koleleki chilame. 7 Abhebhusi bheswe bhakolele ebhibhi, nawe olyanu bhataliwo, na echinyasibhwa ne ebhibhi bhyebhwe. 8 Abhagaya bhachitungile; ataliwo na umwi owokuchisosha mumabhoko gebwe. 9 Echibhona ebhilyo kwo kwitula muntambala, kulwo kubha iliwo imbanda ya ibhara. 10 Olususu lwo omubhili gweswe lwabheye na libhilabhila lwa amasiga go kutekela kulwa injala omweko. 11 Achagasi bheswe bhalibhilwe susa bhali kuchima cha Sayuni, nolwo abhabhikila ona mubhikale bhya Yuda. 12 Abhatangasha bheswe bhagegelwe no kunyigwa; abhakaruka ona bhatakuyabhwa chibhalo. 13 Abhasambaya abhasinyilisibhwa okusha obhulo lwa abhagaya; abhasigaji abhalibhata nibhatalatala bhetwikile emijigo misito ja jingwi. 14 Abhakaruka bhatacheyanja mwilango lye echikale, na abhasambaya bhatachabhina jingoma. 15 Likondelwa lye emoyo litachaliwo mu bhulame bhweswe; okusulumbala kweyanjiye ambhina geswe. 16 Chitachaliwo chona chona echokwikuisha chakolele ebhibhi, na olyanu chatabhwa. 17 Echilwasibhwa no obhusito bhwe emyoyo jeswe. na chitakutula kulola chili na amasiga. 18 Kulwo kubha echima cha Sayunu chili chenyele na chasigilwe, na jinya mubhwe ejitaja ingulu yacho. 19 Nawe, awe Yahwe, ukamile kajanende, na ulikama amaimbo na amaimbo. 20 Kubhaki uchisindikile kwo omwanya mulela? ulichijuka eswe katungu kandi? 21 Nusubhe uchigege lindi, Yahwe! Nusubhe uchigege! Nusubhyewo jinsiku jeswe eja kala. 22 Amo wachilemele silisili? Amo ebhinyiga bhao bhitali na bhusubhilo?