¹ Niwo Yona nasabha Omukama Nyamuanga waye okusokelela mulubhunda lwa inswi. ² Naika ati, "" Nakubhilikie Mukama ingulu ya jinyako jani, nuunyitabhilwa, Okusokelela nyombe nakuliliye unsakile! Awe nuungwa obhulaka bwani. ³ Wandasile emwalo, munda yo omwoyo gwa inyanja, amanji galiga ganjongee; amakonjo gona na likulimbi lyao lyona nililabhaga ingulu yani. ⁴ Ninaika ati, ' Nalaswa kula na ameso gao; nawe nitalilola lindi liekalu lyao linu litali na bhibhibhi. ⁵ Amanji ganfundikiye nigakinga mubicha byani; inyanja niimbulishamo; Olwenge nilunswikilila omutwe gwani. ⁶ Nagendele emwalo ye ebhima, ninkinga mumacho echo emilyango jacho jaliga jigawe kajanende kona. Nawe awe Omukama Nyamuanga nunyelula okusoka mulyobho. ⁷ Nejile Omwoyo gwani gukakabha, ninkubhilikila awe Omukama, lisabhwa lyani nilikukingako, mwiyekalu lyao linu litali na bhibhibhi. ⁸ Abho abhalamya ebhisusano bhinu bhitali na mulimo, Abhatagana no obhulengelesi bwhebhwe kwawe. ⁹ Nawe anye, nilikwimbila no kukukusha; Nilikusosisha echitambo no kukola jinu nalagile Omwelulo ogusokaga ku Mukama. ¹⁰ Niwo Omukama Nyamuanga nalagilila inswi imutanake Yona kumwolo, na nimutanaka.