¹ Omusango gwo Omukama nigukinga ku Yona Omwende Amitai, nigwaika ati. ² "Imuka ugende Ninawi, muchikale echikulu, uchibwire kwo obhulaka bhunene, Okuba amayano gebhwe gali imbele yani." ³ Nawe Yona nasoka imbele yo Omukama nabhilimila Tarashishi. Nolomoka ukuja Yafa, nabhona ingama inu yajanga Tarashishi. Mbe naliya inauli no kulinya ingama okuja Tarashishi Okwiseleka Yahwe. ⁴ Nawe Omukama natuma Omuyaga gwe echi ule kunyanja, inyanja nifurunguka. Ingama nilebhelela okwatika. ⁵ Abafugisha bhendemo nibhobhaya muno na bhuli munu nalilila nyamuanga waye. Nibhalasa impula inu yaliga ili munga munyanja koleleki bhakeye ubhusito. Yona aliga ali emwolo muchiinda, aongee. ⁶ Mbe Omugobhi wa ingama namujako, na mubhwila ati, " Kubhaki uongee jintilo? Imuka! Usabhwe nyamuhanga wao! Lugendo nyamuanga wao alakungwa Chisige Okusingalika? ⁷ Mbe bona nibhabhwilana, 'Muje, chibhusilishe chimenya niga unu aletelesha ubhubhi bunu bhwachibhona? Mbe nowo nibhebhusha, intambala nimugwila Yona. ⁸ Niwo nibwabwila Yona ati, " Echisabhwa uchibwile niga aletelesha amabhibhi ganu gachibhona Omukola mulimo ki, na usokela aki? Echolo chao echitoghwa kutiki, na uli wa Luganda ki? ⁹ Yona nabahabwila ati, " Anye ndi Muebhurania; Enubhaya Omukama, Nyamuanga wa mulwile, unu amogele inyanja ne echalo chumu. ¹⁰ Mbe abhanu abho nibhasubha oukubhaya muno, nibhabwhila Yona ati, "Wakola chinu ki chini? Kulwo kubha bhamenyele ati kabhilima obhusu bwo Omukama, kubhaaliga amalile okubhabhwila. ¹¹ Mbe niwo nibhabhwila Yona ati, " chikukoleleki koleleki inyanja obhone okucholela? kulwo okubha inyanja yaligendelelaga okufurunguka. ¹² Yona nabhabhwila ati, " Mungwate na muntubhishe munyanja. Niwo inyanja eichulela, kunsonga nanye naletelesha echiule chinu okubhakingako" ¹³ Amwi nejo abhanu bho bhafugile kwa amanaga okusubha kuchalo, nawe nibhatamwa okubha inyanja yanyamukile muno nibhabhumwa no obhutwe. ¹⁴ Mbe nibhasabhwa Omukama, nibhaika ati " Echikusabwa, Mukama, echisabha utachisindika chikasingalika kulwa injuno yo obhulame bhwo umunu unu; Utachilamula kubhibhi nolwo omunu unu akafwa. Kulwo kubha awe Mukama wakola kutyo wendele. ¹⁵ Mbe nibhabhatula Yona nibhamutubhisha munyanja, niwo inyanja nichulela. ¹⁶ Niwo abhanu abho nibhamubhaya muno Omukama. Ni bhasosha ebhitambo ku Mukama no kulaila. ¹⁷ Omukama aliga ategekele inswi nene muno imumile Yona, enjile amilwa nabhamo mulubhunda lwa inswi eyo kwa nsiku esatu, mugeta na mumwisi.