Sura ya 8

1 Umusikha uYeesu peayikhile ukhuhuma khu khidunda, uvumati vukhomi wa mufwatile. 2 Lolake, umunya vukomo ayichile nu khusujudu pavulongolo pa mwene akhachova, "Mtwa, ndee uvele tayali, wiwesa ukhunifanya ndive munofi. 3 U Yeesu akolwise ilivokho lya mwene nu khumuvata, akhachova, "Ndivele tayali. Uvechake munofi." Baho baha akhavalala uvukoma wamwene. 4 U Yeesu amuchovie, "Uwangalilake utane ukhuchova khwamunu yeyoha. Ukhamutake injila ya vushuhuda wadi yealakiche uMusa khwajili ya vushuhuda khwavo." 5 Umusikha uYeesu peafikhe khu Kapelinaumu, Ujemedali akhayicha khwa mwene akhavucha 6 akhachova, "Mutwa, umutumishi vangu akonile khunyumba aposiche avele nu vuhunguwa khuyokofya." 7 U Yesu amuchovie, "Ndiyicha nu khumuponia." 8 U jemedali ahikile nu khumuchovela, "Mutwa, unene sindi veli va samani hata wiche nu khuyingila mukati mu dali yangu, uchove lichotu nu mutumishi vangu ipona. 9 Pakhuva nayune ndivele munu yendivele na mamulaka, na ndivele na vasilikhani yevavele panyi pangu. Uvone ndichovo khwa uyu "Ubitake' ihelela, nu khwayungi wiche nayumwe ne iyicha na khwa mutumishi vangu 'Ukhite ewe,' nu yumwene afanya ewe" 10 Umusikha uYeesu peapulikhe aka, akanisichwe nu khuvachovela vala yevavele vakha mfwata, "Salwesi ndikhavachovela, Sinandivona umunu umunya lufuvo kama uyu mu Isilaheli. 11 Ndikhavachovela, volofi yaviyicha ukhuhuma khumashaliki nu khumakhalibi, vitama pa mesa pamonga nu Abulahamu, Isaka, nu Yakobo, mu vutwa wa khushanya. 12 Lakhini avana va vutwa yavitakwa khu ng'isi ya khwivala, khweya khwivani khivembo nu khuhalula amino." 13 U Yeesu amchovie u Jemedari, "Uhelelake! Kama shenu fuvilwe, na yitendekhake ewe khwakho". Nu mutumisi aponi saa yiyo. 14 Umusikha uYeesu peafikhe khunyumba ya Petulo, amuweni umama umkhwive va Petulo akonile avele ilwala ihoma. 15 U Yeesu amuvatile ilivokho lya mwene, ni homa ya mwene ya mlekhile. Halafu alamwikhe akhavanga ukhuva hudumila. 16 Na peyafikhe imihe, avanu va muletie uYeesu volofi yavatawalilwe na mabepo. Akadakile amabepo na vala ya vavele vilwala avaponiche. 17 Khwa njila iyi katimie kala keka malile ukhuchowa nu Isaya muvilisi, "Umwene yumwene atolile amatama ketu nu khupinda uvusayifu wetu" 18 Halafu uYeesu pealiwene ilikhushanyikho limusung'wikhe, atolile amayeleso akhuhelela uvupande vungi wa nyanja ya Galilaya. 19 Nekhe umuyandikhaji akhayicha khwa mwene nu khumchovela, "Mwalimu, ndikhakhufwata pepoha peya wihelela." 20 U Yeesu amuchovie, "Amakheve khana milindi ni fideke fya khushanya fina fisangilwa, lakhini umwana va Adamu saveli ni sehemu ya kukonekha umutwe kwa mwene." 21 Umunyasu uyungi amuchovie, "Mutwa, umele uluhusa ndikha msile ubaba vangu." 22 Lakhni uYeesu amchovie uvalekhe avafwa vasile avafwa vavo." 23 U Yeesu peayinje mu waatu, avanyasule vamwene vamufwatile muwaatu. 24 Loleke kwa yinwikhe umuvelo mukomi musha mu nyanja, kiasi kwamba uwaatu wakubikhilwe nu muvelo. Lakhini uYeesu avele akonelye. 25 Avanyasule vayichile khwamwene nu khumulamusa vakhachova Mutwa utuhose uwewe, twiyelekhela ukhufwa!" 26 U Yeesu avachovie, "shekhi mwiyokopa, unyenye vanya lufuvo ludebe?" Nekhe alamkhe nu khukhenyela ilipalangulo ni nyanja. Nekhe khukha nu vutulifu vu khomi, 27 avakosi vakhakhamulwa nu vukanisa vakhachava uyu munu vayinagani hata ilipalangulo ni nyanja fikhamwinatila umwene?" 28 Umusikha uYeesu peavelayichile uvupande uvungi wa inyi ya Magadala, avakosi vavili yevata walilwe na mabepo vatang'anishe nave vahumie khumakabuli vafanyaka umutafu sana, khiasi khwamba hakhuna musafili yeiwesa ukhuluta injila yila. 29 Lolaka, vayovile khwa savuti nukhuchova, "Tuvele nakhi isha khufanya khwakho, mwana va Nguluvi? Uyichile apa khutupumusa kabula ya musikha ukhufikhila?" 30 Lino ulupinga lukomi lwa makweho lwadi mwaka, sipaveli patali sana pevavele, 31 amabepo kayendelye ukhulalamikha khwa Yeesu nu khuchova. "Ndee ukhatuluhusu ukhuheka utusi ndikhe khu lupinga lwa makwehe." 32 U Yeesu akachovie, "Mubitake!" Amabepo kakhaheka nu khuhelela khu makwehe. Na lolake ulupinga lwoha lukhayikha ukhuhuma khukhidunda ukhuyikha khu nyanja na lwoha lukhafwila mumakasi. 33 Avakosi yevadimaka amakwehe vanyilile. Na pevahele khumujini vamuyelesiche khila munu ukhuhusiyana ni she khihumie khwa vakosi ya vatawalilwe na mabepo. 34 Lolaka muji musima kwayichile khukutana nu Yeesu. Vali vamuwene, vamubembelise aheke mumukowa kwavo.