1 Malaika kalora dahu ya mringa o uchiha, mringa nyuvekeri ong'eri ng'eri cha ubitari. Nyuvekeri ukushishina ifuma kitiri nyi kya umanginyi kya Makilunga na kya Mwana o imondo. 2 Kuoidia makidi shiongonyi sha muri. Kila marinyi ya duhu kuveode kidi kye chiha, unavika aina kumi naivi sa (mbeu) ndunda upevika ndunda ko kila mori. Mara va shidi nyi kokitevi kye chira kya mataifa. 3 Nama kupeada mbiagho yoyesesepo. Kitiri kya umanginyi kya Makilunga na kya Mwana o imondo kipeva iposhi mrinyi na vatumwa vake vape mtumikia. 4 Vapemuona kyamu kyake, narinajake jipeva uye ya oshangunyi savo. 5 Kupeva kio sepo; nama kupeva kouri ilangara o kirangaro ana mbari amu Mndumi Makilunga apelangara uye yavo. Navo vapeitori ndarasi na ndarasi. 6 Malaika kangivia, ''Shidedo shi nyi sheaminika na loi. Mndumi Makilunga o ngoo sa valashi nyalemnduma malaika wake ilora vatumwa vake kipefumia kufui.'' 7 ''Lambwa! Nganacha movinyi! amenengwa mbora icho ameadanya shidedosha valashi o kitabuki.'' 8 Inyi, Yohana, nyinyi ngaleichwa naiona shindoshi. Ngamevaichwa nai vaona, ngaleingi wanda ngimonyi o shangunyi madendenyi va malaika imwabudu, malaika nyulengilora shindoshi. 9 Kangivia, ''Utautekudo! Inyi nyi mtumwa chaigwe, anduamu na vanduamu valeshi, andu amu na vaja vaneadanya shidedo sha kitabuki. mwabudu Makilunga!'' 10 Kangivia, ''Ulavikye ofano shidedo sha ulashi o kitabuki, amu kieri kinashikya. 11 Alakeri ainyarie, natorwe na alainyarie. Nacho nyauluhie maadili, natolwe iihuha ko maadili. Ainyarie, natolwe iva ainyare. Akeri muele, natolwe iva mwele.'' 12 ''Lambwa! Nganecha movinyi. Iliha jakwa jikeri nainyi, ili mlihia kila umu chakundu aleuta. 13 Inyinyi Alfa na Omega, ousinde na ulau, usindena ulau. 14 Vaode mbora vaja vasanjie nguvo savo kinesa vainyariwa yeja ifuma kokidi kya uchira na ingia mrinyi ko ingia mongo. 15 Njakuode shite, vasavi, vanongo, veagha, veterwa marima, na uja akundie naikulora ushahidi o vongo. 16 Inyi, Yesu, nganduma malaika okwa ikuloria ko shindoshi makanisenyi. Inyi muru o ishaoja Daudi, ng'eng'eri ya kiaranga yeng'eng'eri.'' 17 Ngoo na mndu mwaji ame amba, ''Njio!'' Nacho apeichwa naambe, ''Njio!'' Wowose aichwe nyoda, na che, nawowose auri, napate mringa ochira mana. 18 Ngana mloria kila mundu apeichwa shidedo sha ulashi o kitabuki: cha yoyose apeongerija ko ishi, Makilunga ape muongerija ikava shikavua shireghwa kitabunyiki. 19 Cha mundu wowose apefuma shidedo sha kitabuki kya ulashi, Makilunga apefuma andu ake ko kidi kya uchira ko mri mwele, nacho shidedo shake sireghwa kitabunyiki. 20 Icho apekulora shimndoshi apeamba, ''Ncho! Ngana cha movinyi.''Amina! Njio, Mndumi Yesu! 21 Mbora ya Mndumi Yesu ive na kila mundu. Amina.