1 Paulo na Timotheo, nyi walumishi wa Kristo Yesu, ko vaja vatengwea ko vaja valengea vekedamia Filipi, vakeri na vangalizi na mashemasi. 2 Mbora na ive kwanu na amani ifumayo ko Makilunga Papa odu Yesu Kristo. 3 Ngamtereshe Makilunga okwa kila nga mkumbuka, inywe mose. 4 Mara sose ombinyi jakwa ko ajili yanu, inywe moose mode seko ngamterefyenyi. 5 Ngode shukrani sifoje ko kilevi kya irambatana jedu injilinyi tangu mfuri ja kuoka inu. 6 Ngode haki na icho aleanzisha uya mchangonyi sedu apendelea itebera mpaka mfuri uja Mndumi Yesu Kristo. 7 Na sawa kokwa ngadanya uye anu inywe mose ko kitevi ngalemderenyi ngonyi yakwa. Maana inywe mkeri vandu vakwa ko mbora yo kipungo kyakwa ijitetea jakwa ikamilisha jakwa ko kidedo kya injili. 8 Makilunga nyi mbele okwa chakundu ngakeri ham uyeanu vose, ko okundolo ndani lo Kristo Yesu. 9 ngatereva kee: ukundo lwanu luongerijike kavi na kavi ufahamunyi wanu wose. 10 Ngalereva ko ajili ya iki muve na oru lo pima na sembura shindo shikeri shicha. Pia ngavaterevia ili muve vandu va ele kulade ikosa jojose mfuricho o Yesu Kristo. 11 Na ili mjaswa na itunda ja haki ko Yesu Kristo, ko utukufu na sifa ya Makilunga. 12 Lwaha lanye vandodu, ngauri mmanye kee, shija kokwa shile vika injili idambuke. 13 Nkyo shifungo shakwa shikeri ko Kristo, shulemanyika ko vangi va ikulu vose na ko kila mndu. 14 Na vandu vavoje ko Mndumi, ko kitevi kya shifungo shakwa, vale shawishika naikarija ihubiri kidedo alaode woghu. 15 Vanina vavo loi vechi mtangaza Kristo ko umbea na ko unangwa na vengi ko nia njicha. 16 Vaja vakemtangaza Kristo ko okundo vaichi ngale vadera ha ko itetea injili. 17 Kake ivo vengi vaketanga Kristo ko naja savo na nia mbuchwa. Vakenata ke vapengi nenga mnyororo yangu. 18 Ko ikyo? ngapoga, shida yoyopo am kwaku ngode hila uloyi, Kristo nyapalanga swa ko ikyo ngenavorokya na! Ngape, vorokyoa. 19 Ko kuwa ngaichi iki kipende inghujwa kindo ki kipefumija ko kitevi kya kiterevo kyanu na ngo ya Yesu Kristo. 20 Ilingana chakundu ngauri matarajio ngapona, sonupo ila ngapeting'ide chakundu mfuri sose. Ngaichike Kristo apengiteshuja osese nyi. 21 Ko ikyo kokwa inyi, idamia nyi Kristo na ipa omaso. 22 Ko, kuwa idamia osesenyi nyi ipesha itunda uyeny okwa, koikyo ngaichi ka ngape sambura. 23 Am ngakena sukumwa na, shindo sho osese ngode ham ye tija osese na iva na Yesu, kindo kyode dhamani sana. 24 Ingawa, ibaki osesenyi lu kindo kyode umuhimu ko kilevi kyanu. 25 Ko kuwangode uhakika uye a aki, ngape baki na ngiendele iva pamoja na inywe mose, ko ajili sia yanu. 26 Na iki kipende sia yanu ndue ko Yesu, Kristo ko kitevi oru lokwa na inywe. 27 Mnalakiwa mdamie mwenendonyi mcha upendambukya injili ya Kristo. Ili ngacha ngichevao ana ngalemache, ngiichwa kee mkeri imara ngonyi sanu ngakelamani iichwa kee mwode ngo imo. Mkeshi naania imani ya injili ya kristo, ko pamoja. 28 Mlatishwa na kindo kyokyose kinauta na vavichwa vedu. Iki kwavo nyi kunya nyamara. Bali kwanu nyi sanjwa ifuma ko Makilunga. 29 ko kuwa inywe mlenengwa ko ajili ya Kristo, chi imwamini nai, teswa ko ajili ya Yesu. 30 Kwa kuwa mwode unangwa uja uja kokire muleuona kokwa mkeichwa kee na ngaode hata luahakudi.