1 Baada shindo shi, Yesu nyaleenda kiwari kya Bahari ya Galilaya, ade nyedikirwa Bahari ya Tiberia. 2 Msangiryo mdue uwekeri vwadia kitevwi vwaleona ishara alesiuta ko wandu vwalue. 3 Yesu nyaledoja wuye kiwari kya wuye ya ifumbu na kadamia ipo na walosho wake. 4 (Na Pasaka, sukuku ya Wayahudi yeko imeshika). 5 Yesu kairya mesowuye na iona isanga jidue jinacha kwake, kambia Filipo, ''Nguku jipeenda jineura mikate wandu wa wadime ja''? 6 (Kake Yesu nyaleamba ko Filipo komreghesha amu icho eweichi chandu apeuta). 7 Filipo kamtalwa, ''Hata mikate ya dinari mia iwi ipeshika nama mundu umu ipata kibarandu kinina.'' 8 Andrea, umu o walosho wake mundwavwo ake na Simon Petro kambia 9 Yesu, ''Kuode msoro iha aeode mikate itanu na makunga wawi, kake iki kipeuta kiki ko wandu wafoji kudi?'' 10 Yesu kawawia, ''Wadamirenyi wandu wanda'' (Andu aja kuode mara wafoje). Wakadamia womi elfu sitanu wanda. 11 Iho Yesu kainya mikate itanu katareshe kawawia waja wamedamia. Na kudo kawawia makunga cha kiinyarie. 12 Wandu wakanda, nyalewawia walosho wake, ''Shikusanyenyi shibarandu shasiaka, shiladeke.'' 13 Basi wakasang'irya na ichurisa shikapu ikumi na shiiwi, shibarandu sha mikate itanu ya shairi - shabarandu shasaghirwa na waja vweleja. 14 Iho andu vwaleona ishara aleiuta, wakambia, ''Loi ichu nyicho mwiroti acheje arikenyi.'' 15 Yesu emanya ke vweuri na mwada ili vwanenge umangi wawo, kakusambua, kaenda ifumbunyi icho amonyi. 16 Ishika kyukwanyi, walosho wake wakasoka wakaenda ziwenyi. 17 Wakadoja ngalawanyi wakeri naitola ielekea na Kapernaumu. (Moma umeingia na Yesu nyewekeri bado anecha kwavwo). 18 Kyeri kukacha avukuta, lukali na bahari ikaendelea iluhiana. 19 Kingi walosho wake kigheri wakenekawa makasi cha makumi wawi na watanu au makumi waradu, wakamuona Yesu akenandambuka wuye ya bahari kufui na ngalawa, na wakaoghwa. 20 Kakekawawia, ''Nyinyi! Mlaoghwe.'' 21 Nawo wekeri tayari vwamwirie ngalawenyi, na kudo ngalawa ikashika batenyi naipo andu wakeneenda. 22 Ngamaingi, indiki ja wandu weimkani kivwari kya bahari waleona kuoda se ngalawa po iya Yesu na walosho wake walamedoja kake walosho wake wekeri wamekure wenyi. 23 (Kuweode ngalawa ujitale silefuma Tiberia kufui na andu waleja mikate baada ya Mndumi itereshe). 24 Kigheri indiki wemanya ke chi Yesu nama waloshi wake po wekeri kuja, iwo wawenyi waledoja ngalawa wakaenda Kapernaumu wemshigha Yesu. 25 Inde muone kiwari kingi kya ziwa wakamwesera, ''Rabi nyulecha indi kunu?'' 26 Yesu kawatalwa, ''Amini, amini, mkinangishigha inyi ele kitevwi ishara, ana kija kitevwi mleja mikate na iwuda. 27 Denyi inindia kasi kando kenyamarika, indi mrundie kasi kando kipedamia ndarasi na nyikija mwana o Adamu apewanenga ko Ruvwa Papa amedera kingisho kyake.'' 28 Ade wakambia, '''Nyi ngikyo jiwurwa jirunde uya o Ruvwa?'' 29 Yesu kawatalwa, ''Iki nyikyo uya Ruvwa: ichi mumwamini icho alangiduma.'' 30 Basi wakambia, ''Nyi ishara singa upesinta, jipedima siona na jikuamini? Ngikyo upeuta? 31 Wafee weda vwaleja manua alukung'unyi, chakundu kireghwa, nyawanengie mikate ifuma Ruvweu waje.'' 32 Ade Yesu kawatalwa, ''Amini, amini, chi Musa awanengie mkate ifuma Ruvweu, nudi Papa okwa achiwanenga mkate o loi ifuma ruvweu. 33 Amu mkate o Ruvwa nyi uja osoka fuma ruvweu na ikuunenga nwo orikenyi. 34 Basi wakambia, ''Mundumi jinenge mkate cho kigheri kyose.'' 35 Yesu kawawia, ''Inyi nyinyi mkate o moo, icho apecha kwokwa apepata njaa po nacho angiamini apeichwa nyoda too.'' 36 Na iwawia kudo, mlengiona, na mkeamini po. 37 Wose Papa akenanginenga wapecha kwokwa na icho Oose apecha kokwa ngapemkumba nja too. 38 Ko kija ngilesoka fuma ruweu, chi ko kitevwi kyenta okundo lokwa po andi nyi okundo lo icho alengiduma. Na ikyo nyikyo olukundo lwake lo icho alengiduma. 39 Kimbi ngalamdese nama umu ko waja alenginenga, ngapewarusa mkono o mwisho. 40 Ko ikyo nyikyo olukundo lo Papa okwa, ko icho oose apemlambwa Mwana na imwamini napate moo o ndarasi, na ngapemrusa mkono o mwisho. 41 Ade Wayahudi wakamnungumikia kitevwi nyaleamba, ''Inyi nyi mkate ulesoka fuma ruwewu.'' 42 Wakaamba, ''Ichu chicho Yesu mwana o Yusuph, ndie na mae jimwichi? Kyavwa kuda lwaha apaamba wai nyalesoka ruvweu?'' 43 Yesu kawatalwa, kawawia, ''Mlanung'ukiane muwenyi ko wenyi. 44 Kuwode mndu apecha kokwa elaburwa na Papa okwa alengiduma, nainyi ngapemsa mkono o mwisho. 45 Ko ikyo kireghwa na wairoti, 'Wapeloshwa na Ruvwa.' Icho aleichwa na kakuloshia ifuma ko Papa, echa kokwa. 46 Chi kuwode mndu alemuona Papa, indi icho alefuma ko Ruvwa alemwona Papa. 47 Amini, amini icho aaminie aode moo ndarasi. 48 Inyi nyi mkate o moo. 49 Wandianu waleja manna olukungunyi, na wakapa. 50 Ichu nyicho mkate uchisoka fuma ruweu na mndu naje ngata yake alape. 51 Inyi nyi mkate odamia ulesoka fuma Ruvweu. Na mndu kaja ngata ya mkate ichu, apedamia ndarasi. Mkate ngapeufuma nyi ose lokwa ko ajili ya moo Ruvweu.'' 52 Wayahudi wakailusha wenyi ko wenyi na wakawoka irikiana wakaamba, ''Mudu ichu kuda apenenga osese lwake jije?'' 53 Ade Yesu kawawia, 'Amini, amini, mlemeje osese lo Mwana o Adamu na inywa ndakame yake, mpeada moo numbenyi kwanu po. 54 Icho ose apeja osese lokwa na ndakame yakwa aode nwo o ndarasi, na kapemrusa mkono o mwisho. 55 Ko ikyo osese lokwa nyikando kya loi, na ndakame yakwa nyikinywaji kya loi. 56 Icho ose apeja osese lokwa na inywa ndakame edamia numbenyi kokwa nainyi numbenyi kwake. 57 Koja Papa aode moo chandu alingiduma na ngechidamia kitevwi kya Papa, nacho apedamia kitevwi kyakwa. 58 Iki nyikyo mkate ulesoka ruvweu chi chakundu waopapa wajijie wakapa icho apeja mkate chu apedamia ndarasi. 59 Yesu nyadegye shindo sho numbenyi sinagoginyi akenaloshia ipo Kapernaumu. 60 Nyiho andu waloshi wake wafojie waichijwa shindo sho, wakaamba, ''Kilosho ki kiomie ngacho apedima wadija?'' 61 Ko kitevwi Yesu nyalemanya ke walosho wake wekerinanung'ukia kindo kyo, kawawia kindo ki kya waraghadisa? 62 Basi kipevwa kuda iho andu mpechemuona mwana o Adamu akenesoka efuma ipo andu ewekeri? 63 Nyi ngoo nyicho echifuma moo. Osese lupate kindo kyo kyose po. Shidedo ngashidedye kwanu nyi ngoo na nyi moo. 64 Kuwode wandu makidi yanu walachiamini na kitevwi Yesu nyalemanya iwokya kuvwoka na uja alapedima amini nacho apemghaluka. 65 Kambia, nyi ko kitevwi ki bgawawije ke kuvwode apecha kokwa alamenengwa na Papa.'' 66 Iho walosho wake wafojie wele uya numa na walesongorana nacho sepo. 67 Yesu kawawia waja ikumi na wawi, ''Je, naiywe mughuri nakure?'' 68 Simon Petro kamtalwa, ''Mudumi jiende kwau na iwe uode shidedo sha moo o ndarasi, 69 Na jimeamini na imanya ke iwe nyi Mwele o Ruvwa.'' 70 Yesu kawawia, ''Je inyi ngalewasambura inywe na umu ounu nyi mnyamari? 71 Lwaha nyekeri nadeda ko kitevwi kya Yuda, mwana o Simon Iskariote, amu nyewekeri umu na waja ikumi na wawi, amu amkana Yesu.