1 Paulo mdumwa oYesu Kristo ko vakundi va Makilunga, kudokudo na kiaga kya moo ukeri nu mbenyi ya Kristo Yesu, 2 ko Timotheo mwana mkundwa: Mbora, rehema uolovu fuma ko Makilunga Papa na Kristo Mndumi odu. 3 Ngane mtereshe Makilunga usa nganemrundya ko moo mcha chakundu valeuta papa sakwa, ngachekumbuka suku ko kitere vyonyikyakwa. Kiyo na 4 msanyinyi ngafudye ngikui one, matika ke ngichure sia. Ngane ukumbuka msoru wapo. 5 Ngecheva ngekumburwa uoloru wapo chee usa iho kuvoka nyiledamya ko chocho wapo Loisi na mao Yunisi. Na ngaode loi ke uoloru cho nyunedamya mumbenyi kwapo kavi. 6 Iki nyikyo kitevi ngane kukumbwa itekerya kibariko kya Makilunga kikeri numbenyi yapoko longanwa derwa mokonyi vakwa. 7 Mekoje Makilunga elejininga ngoosa wonghupo, kake oru ukundo na nganyi. 8 Ko ikyo ulauone soni idadya ihusu Mndumi odu, nama vakwa inyi Paulo mpungwaake. Kake ukwine iviniswa ko vitevi kya injili kudokudo na orulo Makilunga. 9 Nyi Makilunga alejikira na ijidikirako idikira mwele. Eleuta kidipo ihana na uya odu kake nyihana na mbora nampango ake amonyi. Nyelejininga shindo shi ko Kristo Yesu kigheri kija kilamevoka. 10 Kake lwaha mkiro o Makilunga umepumwa ko icha ko mkiraodu Kristo Yesu. Nyi Kristo alemarija kipu na iendemoo ulasie ko kilangaro kya injili. 11 Ko kitevi kyo ngelesamburwa iva mdedye, mdumwa na mlosha. 12 Ko kitevi ki nganeviniswa kavi, kake nganeona ishi po mekoje ngaichi icho ngekeri nganemwidikya. Ngode loi ke icho apedima kidera necha kija ulemningya kwake ata furu ya. 13 Ukumbuke mfano ko kidedo kya loi ulekichwa fuma kokwa, andwamu na idikya na ukundo ukeri numbenyi ya Kristo Yesu. 14 Shidere neche shindo shicha alekuningya Makilunga idya ngoo mwele echedamya numbenyi yedu. 15 Nanchi ke, vose veche damia Asia valengida. indikinyiji vakeri Figelo na Hemogene. 16 Mndumi vaininge mbora numba ya Onesiforo mekoje kafoje nyelengiolora aleonuya sonu po mnyororo okwa. 17 Kivari kyake, andu akeri Roma nyelengichigha ko pinya na kangiona. 18 Makilunga namsarie ipata mbora ifuma kwake furuja. Chakundu alengitarama andu ngekeri Efeso, igwe wichi necha.