Mbwana ya 13

1 Iki nyi mkono o karadu kee gakenacha kwanu. ''Kila ishitaka lazima jishumbwa na ushuhuda wo mashahidi vavi ana varadu.'' 2 Ngelemeamba koikio veleuta sambi kuoka nako vengi vose kingeri gevekeri ipo mfuru o kavi, na ngakenaamba kavi, ihandungapecha kavi: Shaperi mijapo. 3 Ngakenavavia inywe iki ko kitevi mukenashigha ushahidi kee Kristo akededa idia kokwa. Iche chi mulemwa kwanupo, kitevi kike, icho iaonde oru ndani yonu. 4 Koikio nyelesulubishwa kokivi kiya usaifu, kake nya rukie ko oru lo Makilunga. Kemekoja ise kavi nyi vasaifu ndini yake, kake dipedamia nacho ko oru lo Makilunga gholosi yanu. 5 Kulambwenyi muvenyi muone kee mkeri gholosi ya yekunda. Kupimenyi mwenyi. Mpemanya kee Yesu Kristo akeri ndani yanu? Icho akeri, kiungi chakundu mulasibitishwa. 6 Na yunga iarija muduwe inywe mupemanya kee ise dilelengwapo. 7 Lwaha dikenateva ko Makilunga kee muladime iruda kiokioso kivichwa gapereva kee ise didime ilambwa dimeida majaribu, bado, yaka gakenatereva kee mpedima iruda kikeri loi, koja dipedima ionekana dimeshinda ijaribu. 8 komekoja ise dipedima iruda kiokisenuma na loi, kake nyi ko kitevi kia loi tu. 9 Komekoja dikenaghorokiwa kigeri dikeri valemwa inywe mukeri na oru. Dikenateteva kavi kee mudime irundwa valoi. 10 Nganavaregia shindo ishi kingeri ngari kwacha nainywe, kinesa kee kingeri ngakeri kimu nainywe gauri ivalora uvichwa inywepo. Ngaruri imukioru Mndumi alenginingi inyi ngivakavi na chikio givanyamarenyi gwanda. 11 Kake, vandondu vavomi na vavaka, gharokwenyi! Utenyi uya ko kitevi kia ende, muvikiya ngoo, ikianenyi inywe ko inywe, mudamie ko loi. Na Makilunga o ukundo na loi apeva kimu nainywe. 12 Dikiranenyi kila umu ko ucha mwele. 13 Valoi vose vakenavadikira. 14 Mbora ya Mundumi Yesu Kristo, ukundo o Makilunga, na ikusangiriana o mumu mwele uve kimu nainywe vose.