1 Veru, kole mndu andevwarwa hena vuvichwa, imwe va kimbeho, mmwashighwa mumvwighire wenyu tho kwa ngoo ya vuhoo. Mkikulolea mweka ku munajaribiwa. 2 Mutikiane mijigho, na kwa njia yo mwaitimitha sheria ya Kristo 3 Kole mndu wowoshe akyakuvona ku ni mcha ate thi kwio yo, akyakulemba weka. 4 Kila umwi apime ndima yakwe. Niho aghira na kindo kyakwe weka kye kubahia bila ikufananisha weka na mndu ungi. 5 Ang'u kila mndu achetika mjigho wake weka. 6 Mndu aloshirwe kirero nimthari amshirikishe ficha fyoshe mloshi wakwe. 7 Munalembika. Ruva achihereshwawe. Kiya mndu achiviaa nikyo achekeva. 8 Kya achiviaa mbeu hena kifumo kyakwe cha thambi achekova ikondeka, mira uya aviaa mbeu hena mbeho achekova ikia telele ifuma hena mbeho. 9 Funaleghela hena ihira ficha ang'u kwa igheri lyakwe fwachekova kole furakavwie na nyuma. 10 Hena ikyo, igheri fwacheghira nafasi, fuhire ficha kwa kila umwi. Fuhire ficha mnu kwa vaya vake voshi hena iirikilia. 11 Lolienyi vurwe vwa barua nimwandikirie kwa kuvoko kwakwa njeka. 12 Vaya vakyashigha ihira ficha kwa iivaria mwiri nivo vakyamushurutisha murinwe. Vakyahira kwio netha vanaingia hena ilithawa vwathi vwa mthalaba wa Kristo. 13 Kwa ku hata ivo variniwe, navo vachivwara sheria vo. There kwio vakyashigha imwe murinwe netha vairime ikubahia miri yenyu. 14 Kinaghefumia nikakubaha there kwa mthalaba wa Mndumi weru Yesu Kristo. Ni hena we ithanga livambiwe kwakwa na inyi kwa ithanga. 15 Kive ku muriniwe nana muriniwe mwe, thi kindo kyo. There kwio ighirwa kivushaa nikyo kirwe. 16 Kwa voshe vakyaishi kwa kanuni u vave na mborere na mbonea ive kaghu yevo na kaghu ya Israeli Ruva. 17 Ivokea luvaha mndu ananjilitha vwathi ang'u ninatika luvengo lwa Yesu hena mwiri wakwa. 18 Mbora ya Mndumi weru Yesu Kristo ive na ngoo tdhenyu, veru. Amina.