1 Vamangi, funyeni findo kwa vathoro fya keni na uaminifu. Mukumbuke kumughire Mdumi kaghu kwa Ruva. 2 Mukudindishe kwa nthinya hena mambo. Munalaa mario hena itereva. 3 Lombenyi handu hamwi vundu vweru kimetha Ruva arughue kyothi kya kirero, kimetha ukeni wa kirero kya Kristo. Hena mburi ii, nipfungiwa ikube. 4 Kangi mulombe ku niirime ireva keni fundu kinjitarire irera. 5 Ughire kiugho kwa vaya wake bwan'ga kangi mukire igheri. 6 Firero fyenyu fighire mbora mifiri yoshe na ikoe munyu magheri ghoshe kimetha muirime imanya fundu kyafutara imjibu kila mndu. 7 Hena findo fia mfya njitara inyi, tikiko achemba ghamanyike kwenyu. We ni ndughu nimfurie, mhiri mgheria mma, na mthoro weru hena Mndumi. 8 Nnamuruma kwenyu vundu vwa iki, ku muirime imanya findo mfyafutara ifwe na kangi ku airime ivathumija. 9 Nnamuruma hamwi na Onesimo weru nimfurie hena iria mma, na niumwi hena imwe. Vamuvia kila kindo kifumirie iha. 10 Aristarko, mthoro wakwa akyamuirikira, na Marko binamu wa Barnaba ngewe amunikie fundu alechihira ifuma kwakwe. Kole akacha kwenyu mumghuhie. 11 Kangi haghire Yesu aichiilaghwa Yusto. Iva voshe vwaingirirwe ngathu ni vahiri hamwi na inyi hena vufumwa vwa Ruva. Vandetinisha ngoo yakwa. 12 Epafra akyamuirikira. We ni umwi wenyu na mthoro wa Kristo Yesu. We achikudindisha hena maombo, kimetha muirime imka kwa ikuji na ihakikishiwa ikuji hena imfura Ruva. 13 Kwaku nnamfunyira vuonwa ku achihira ndima kwa bidii kwa ajili vweru, hena ivo vake Laodekia, na vengi wake Hierapoli. 14 Luka wia mghanga nimfurie, na Dema mvamuivikira. 15 Vairikire veru vakwa vake Laodekia, na Nimfa, na ikanitha lia like kenyi kwakwe. 16 Barua ii ikamithomwa mothia yenyu ithomwe, kanithani kwia Laodekia, na imwe muhakikishe ku muithomie barua ii ifumie Laodekia. 17 Urere kwa Arkipo, "Ulolie ndima iya ngeyo Mndumi akunikie, ku nkyatara uimalie. 18 Iirikirwali nikwa kuviko kwakwa njeka - Paulo munaivaa makube ghakwa. Mbora iikalie kwenyu.