1 Inyi Paulo, njeka ninamutereva ikughatdha na vumboa vwa Kristo. Inyi ni mhoo igheri nike mothiya yenyu, mira nighire nguju kwenyu igheri nike kua namwe. 2 Ninamulomba imwe iku igheri nikiva hamwi na imwe thacheshighanyi itumia nguju na ikuirima inyi njeka. Mira nadunganya iku ninashigha nive ujasiri wakati nikikavana na vaya vachidunganya iku fuchiishi kwa nguju tdha mwiri. 3 Kwa ku hata kwio fuichi ivara na mwiri, fuchikavana fira vya mwiri fwe. 4 Kwa liya silaha fufwatumia ikarana thi tdha kimwiri tdho. There kwio tdhina nguju ya kiruva yekonda iboma. Tdhichivuta ngeni tdhichiiliilisha. 5 Kangi fuchikonda vyoshe vighire nguju fichikuvutdhira kinyume kua fiavya fya Ruva. Fuchiteka maririkano ghoshe hena imwiichwa Kristo. 6 Na fwaghira utayari welihira mihiro yoshe iraghire irachiichwa, igheri iichwa yenyu yava kindo kicha. 7 Lolea kiya kike mwaji. Kole wowoshe ashawishika iku we ni wa Kristo, leka akukumbutdhe we weka iku fundu akei ni wa kristo, nifo fundu na ifye fukei. 8 Kwa liya hata nikakubaha kadu mnu hena mburi ya nguju yetu ngheyo Mndumi afunyire kweru netha fumujenge imwe neri thi iva konda, thikathonike uyi. 9 Thithashighanyi iku iki kivonekane iku ninamuovosha imwe kwa barua tdhakwa. 10 Kwa ha vengi venyu vachirera, "Barua tdhakwe ni ngai na tdhina nguju, mira kimwiri ni mshokeri. Firero fyakwe fichitara fyo iiraniwa." 11 Vandu va mbare ijo vamanye iku kiya fuchirera kwa barua igheri fuke kua, ni thawa thawa na fiya nghefyo fwachehira fukiva haya. 12 Fuchighenda kua fwe tha ikuvunganya fweka kana ikufwananisha fweka na vaya nghevo vachikukwera voka. Mira vaki kupima voka na kila umwi wavo, vaghire akili vo. 13 Ifwe, hata kwio fwakukwera fwe iira kiringanyo. There kwio fwahira kwio du voshi ya myaka ngheyo Ruva afupimirie ifwe myaka yafika kwa tha vundu wenyu ukei. 14 Kwa ku funde kuongerera fwe veka fukinamuchie imwe. Fulevie vevoka ifika kua tha imwe vundu vwa Kristo. 15 Funakubaha fwe iira mihaka hena ndima tdha vengi. There kwio fufwaverelea iku miirikilie vundu yaleha iku eneo yeru ya ndima yaongereka mnu, na bado ni voshi ya mihaka ya keni. 16 Fufwaverelea hena iki netha ku fuiriwe ibirikira injili hata hena mikoa ikela imwe. Fakabahafwe hena ndima iyahirwa hena maeneo ghengi. 17 "Mira wowoshe akubaha, akubahe hena Mdumi." 18 Ang'u thi uyawe achikuirimisha weka achiirimishwa isipokuwa ni uya ughewe Mndumi andemwiirimisha.