Sura ya 1

1 Paulo, Silwano na Timotheo vaya va nyumba ya Ruva ya Wathesalonike hena Ruva Papa na Mndumi Yesu Kristo. Mbora na mborere ive na imwe. 2 Fuafunya nahavache hena Ruva fundu fwenyu voshe mifiri yoshe fukivarera hena ilomba yeru. 3 Faikumbuka ndima yenyu na miikalie yenu mifiri yoshe mothia ya Ruva na Papa weru, ikudindisha hena ifura na irimilia lighire ikatha na ipho mothia hena Mndumi Yesu Kristo. 4 Vandughu Mufuriwe ni Ruva, fuichi iilaghwa yenyu. 5 Na thafundu injili yeru ichie kwenyu thi hena kirero du, mira kangi ni hena nguju tifumia hena mbeho mha, na hena kweri yoshe. Hena icho, muichi iku ifwe fulevie vandu vake kwiya maghari yenyu fundu vyenyu. 6 Mule vandu vefuigha ifwe na Mndumi, thafundu mugheghuhirie kirero hena vwathi kwa inuliwa lifumie hena mbeho mcha. 7 Na hena matokeo ghakwe mkava veighwa kwa voshe hena Makedonia na Akaiya vaya vairikilie. 8 Hena icho hena ifuma yenyu kirero kya Ruva kinethangana hoshe, na thi ipho Makedonia na Akaiya du. Therekwiyo, kila handu miikalie yenyu hena Ruva indethangana hoshe. Na matokeo ghakwe, fuashighwafe irera chochoshe. 9 Hena icho vo voka vafumanyisha icha yeru lilevie kwiya maghari yavo. Vaavilia thafundu mulemgha lukirie Ruva ifuma hena mirungu ingi na imhirira Ruva ake wa keni. 10 Vaghefunyire mburi iku mwamvera Mwana wakwe ifuma kaghu kwa Ruva, avutiriwe ifuma kwa ngoma. Na iu ni Yesu, afuvikie huru ifuma hena iding'a ya Ruva lichie.