¹ Po ulu bakamu bangu, imbaghanite sona ingubasamba ngani, umwe mwe buhoboke bwangu, sona ni mbumbu yangu yiyo ingwitufikisyamo po a baghaniwa bangu, mwimaghe ngani mwa malafyale. ² Ingukusuma uwe yudiya nu sindike ukuti mughele pakwifwana pakuti mwe bakamu mwa malafyale. ³ Ee, ingukusuma nuwe bu, we mubombi wamwitu umusubiliwa, ukuti ubafwe abakolo aba, pakuti bakabomba ngani poka pakufumusya amasho asa, pika nu kelemeti, sona na babombi abanyitu bosi, babo amagamu ghabo ghasimbiwe mwibuku ilya bumi. ⁴ Muhobokaghe mwa alafyale utubalilo tosi ingupyanisya sona ukuti, ''muhobokaghe'' ⁵ Akaalilo kosi mubange bololo na bandu bosi u malafyale ali pamulyango. ⁶ Mutakapasyaghe nisya chindu chimo lolim munyiputo syinyu syosi, mumusumeghe uchala ifyakusobelwe fyinyu nu moyo uwakupalisya. ⁷ Po ukufwasa uwakufuma kwa chala ghugho ghukilite akifwikisye kosi akamundu ghukwisa pakusunga akisa umoyo winyu, sona ni nyinong'ono syinyu pa kumamatilana poka nukilisitu Yesu. ⁸ Mwee bakamu bangu, pabumalilo inguba busya ukuti mubikaghepo umoyo pafindu fyosi fifyo fyisa ngani, sona ni fighindikiwa ifi ifyanaloli, ni fighindiwa, ni figholofu, ni fiswepu, ni fighsniwa, sona ni fyamuchisi. ⁹ Bombesya imbombo fyosi fifyo mwa manyila pamo ukupokela pamu ukwifwakukwangu pamu fifyo mwafibona mu mwangu, po u Chala umwenecho uwa kufwasa akisa pakuba numwe. ¹⁰ Nahoboka ngani mubumi vwangu ubwa kumamatilana poka nu malafyale ukuti pabumalilo mwandapo sona pakulangisya ukuti mukungumbuka indakung'anamula ukuti mukaleka pakungumbuka, awe, loli mutakabe bu na kabalilo akakulangikisya. ¹¹ Indakuyugha bubuno pachifukwa ichakuti nasobelwa, awe, namanyila umwakwikutisi wa ni findu fifyo indi nafyo. ¹² Pakuba mupina ingumenye, sona pakuba mukabi kope bu ingumenye, sona pakuba mukabi kope bu ingumenye, pakuti namanyila ubusyefu ubwakwikutisiwa na fifyo indi nafyo, kali pakuba ni fyakulya ifyingi kali pakuba ni sala, kali indi nafyo ifyingi, kali ngusobelwa. ¹³ Ningaboma ichindu chosi ukwendela mumwake yuyo akumba amaka. ¹⁴ Loli chikaba chisa ngani ukuti umwe mu gabane nune mundamyo syangu. ¹⁵ Umwe mwe ba filipi mwe mwe musi menye akisa ngani ukuti bo nafumaku makedoniya mumasiku agha kwanda aghakulumbilila amasyu amisa, chitakabako ichipana nachimo-chimo chicho chikanyafwa pafundo lya ndalama, loli mwemwe bubu. ¹⁶ Bo indi mu Tesalonika, mukandumilagha ubwafwilisi pipi-pipi pakunyafwa mufya kusobelwa fyangu. ¹⁷ Kute kokuti ingubika umoyo wangu pa fyabupi fingu fifyo mukamva, awe loli chicho ingulonda chakuti mupokele ulusayo pachifukwa icha chisa chinyu. ¹⁸ Naloli napokela fyosi, sona indi nafyo ifyingi ulu indi nafyo fyosi ifyakusobelwa, pakuti u Epufuladito ambile fifyo mukandumila, fiyanite bubu ni chakwiyipa ichamunusi umwisa, ghugho ghu kumuhobosya ngani u Chala. ¹⁹ U Chala wangu akwisa pakubapa ifya kusobelwa fyinyu fyosi ukuyana nu bukabi bwake ubwalughindiko mwa Yesu Kilisitu. ²⁰ Ubu chindamu bubaghe kwa Chala u Tata bwile na bwile! Ameni. ²¹ Mubalamuke abandu bosi abaswepu aba Chala mwa kilisitu u Yesu. Abakamu babo bali poka nune kuno bakubalamuka. ²² Abandu bosi abaswepu aba Chala kuno, ngani-ngani abs munyumba lya bunyafyale bakubalamuka. ²³ Ichisa icha malafyale u Yesu kilusitu Chibaghe numwe mebosi bwile na bwile.