¹ Une ne pabuli poka nu Timoti,uswe twe babombi aba kilisitu, nukubasimbila abandu bosi abaswepu aba Chala aba mu filipi bobo ubumi bwabo bwamamatilana poka nu yesu kilisitu, ngani-ngani abalongosi aba chipanga, sona na bakubafwilisya babo. ² Ichisa nu kufwasa ifwakufuma kwa Chala utata witu sona ni fyakuma kwa malafyale Uyesu kilisitu fibaghe numwe. ³ Ingumupalisya uChala la wangu akabalilo kosi kako ingubakumbuka. ⁴ Akabalilo kosi kako ingubiputila mwe bosi, ingubiputila nu buhobofu. ⁵ Imbaghile imbapalisye ichifukwa mwanyafwagha pakulumbilila amasyu amisa ukwandila ko kubwandilo mupaka ulu. ⁶ Indakwilamwa napo pandindi ukuti UChala, yuyo akanda imbombo inyisa mupaka pisiku ilya murima ukwa kilisitu. ⁷ Chisa ngati ukuti imbinong'onela ghe bunobuno, ichifukwa mwebosi muli pamoyo wangu. Pakuti mwebosi mwa gabana nune ulusako lulo UChala ambile pakughimila, sona nukughikasa Amasyu Amisa, kali indi munjela, kali ne mundu umwabuke. ⁸ Uchala we kamboni wangu ukuti inguyugha ubwanaloli,bo inguyugha ukuti ingubasamba ngani, sona we kamboni wangu imbaghanite ngani ukuyana na mumo Ukilisitu Uyesu abaghanile. ⁹ Ingwiputa ukuti ulughano lwinyu lwendelelahge pakulilakulila nukupulikisya akakufikapo, Sona na muchililisi. ¹⁰ Umwa kuti mumanye pakusala chicho chisa, po mukwisa pakuba bandu abaswepu,sona na basita chilema nachimo-chimo mupaka pisiku ilya kilisitu. ¹¹ Ubumi bwinyu bukwisa pskwisula na kayilo akisa ngani kako kakwisila mwa Yesu kilisitu pachifukwa chichichi abandu bakwisa pakumughindika nukumupala Uchala. ¹² Mwee bakamu bangu ingulonda mumanye ukutisisyo sikangwila sikafwa ngani pskufumusya amasyu Amisa. ¹³ Po bumobuno abalindilili bosi aba munyu it's malafyale, sona na bandu bosi abangi bubu basimenye ukuti indi mujela pachifukwa ichakuti ne kamboni uwa kilisitu. ¹⁴ Pachifukwa ichakuti indi mujela, abakamu bangu abangi bakuyimba ngani mwa malafya , sona bakulumbilila amasyu a Chala umwakusita ubogha nabumo-bumo. ¹⁵ Momumo abandu bamo bskumulumbilila u kilisitu pachifukwa ichakuti Bali na kabini, son bakulonda ukubapa nune. Loli abandu bamo bakulumbilila pa chifukwa icha nying'ono inyisa. ¹⁶ Abandu bababa bakubomba buno-buno pachifukwa icha lughano pakuti basimenye ukuti uChala ambile imbombo iyakughimika amasyu Amisa. ¹⁷ Abangi batakumulumbilila U kilisitu ni nyinong'ono inyisa, loli bakulumbilila nu moyo uwakwiyighana. Bakwinong'ona ukuti bakwisa pskumbelela indamyoinyati ngani bo indi mujela. ¹⁸ Chite ni mbombo? Kali kakulumbilila mubumyasi Kali mubwanaloli chochi chikulondiwa bubu Chakuti u kilisitu akulumbiliwa. Ihobokite bubu nacho. ¹⁹ Paku isimenye ukuti ukwendela mu hyiputo syinyu, sona nu bwafwilisi ubwa mumupepo uwa Yesu kilisitu, ingwisa pakusatuliwa. ²⁰ Po uli ingulindila nu kusubila ngani ukuti indakwisa pakubomba po nachimo chingangosya isoni. Loli ingusubi ukuti ingwisa pakuyimba umoyo umwakuti ulu ngati bwile Ukilisitu akwisa pakughindikiwa numalafyale, kali mubumi kali bufwe. ²¹ Pakuti une ubumi we kilisitu, sona ubufwe bope kokukaba. ²² Loli nandi ukwendelakukwangu pakuba nu bumi muchisu ichapasi ichi chikumba ulusako ulwakuti imbombe imbombo iyakwafwa abandu abangi, po inda kuchimanya chicho ningasala. ²³ Ingughusiwa kumbali syosi sibili kulubafu loka ingulonda ngani ukuti ngali nabuka pakwikala poka nu kilisitu. chichicho chindu chapamwanya ngani. ²⁴ Loli kulubafu ulungi, chindu chakulondiwa ngani ukuti imbaghe nu bumi. Pachifukwa icha mwemwe. ²⁵ Umwakusita ukwilamwa isimenye ukuti ingwisa pakuba nu bumi,ingwisa pakwendelela pakubafwa mwebosi ukuti ulwitiko lwinyu lukulaghe nukubapa ubuhoboke ukukila kale. ²⁶ Umwakuti bo indi numwe sona, mu kwisa pakuba ni fifukwa ifyakukwana ifyakwitufisya nune mubumi bwinyu ubwakumamatilana poka nu kilisitu. ²⁷ Ichindu ichapamwanya chakuti akayilo kinyu kayane na masyu Amisa aghakuyugha nisya kilisitu. Ingulonda ukwifwa ukuti mukwiyula ngani nu moyo ghoka, ingulonda ukwifwa sona ukuti umwakwifwana, sona nu mwakwafwana mukulwa ingondo pachifukwa icha kusubila amasyu amisa. ²⁸ Mutakoghopeghe abalughu binyu mubange bakifu ngani bwila, Po ichi chikwisa pakubasimikisya ukuti bakwisa pakupotwa sona umwe mukwisa pakupota, paku Uchala we yuyo ukubapa ubupoti. ²⁹ Pakuti mupeghibwe ulusako ulwa kumubombela Ukilisitu,tekumusubila kwene,awe loli nukuyimba bubu pachifukwa icha yuyo. ³⁰ Numwe bubu mukulwa ingungondo yila -yila yiyo mukayibona ingulwa, sona yo yiyo mukifwa ukuti ingali ingulwa nulu bubu.