¹ Panyuma pa fyosi ifi ngaketa abandu mifolo bimiliye mumakona folo gha chisu. Abene bakatisyagha imbepo folo ukuti sikaleke ukuputa pachisu, pamo panyuma, pamo pikomo lyosi. ² Po ngaketa uwandumi yungi kubumalilo bwa lisuba wali ni chidindo icha Chala wa bumi. Nilishu likulu akitisya kubandumi folo bala, po uChala abapile amaka ukuti bakomanye ichisu ni nyanja. ³ Po atile, "Leka konanga, pamo inyanja pamo mikomo, mpaka tubakike ichimanyikwilo pa fwene fyababo mbeleshi ba Chala witu. ⁴ Po lelo ngapulika ubwingi bwabandu bo bakabasimba ifimanyikwilo fya Chala bali fikwi amakumi kumi ni fikwi folo pamwanya sona folo. Abandu babo bafumite mu luko lwosi lwa Isilayeli. ⁵ Aba luko lwa Yuda bo bali nifimanyikwilo pafyene fyabo bali fikwi kumi ni fibili, ukufuma mu luko lwa Rubeni bakaba ifikwi kumi ni fibili, kufuma mu luko lwa Gadi, bakaba ifikwi kumi ni fibili. ⁶ Ukufuma mu luko lwa Asheri bakaba ifikwi kumi ni fibili, ukufuma mu luko lwa Nafutali bakaba ifikwi kumi ni fibili, ukufuma mu luko lwa Manase bakaba ifikwi kumi ni fibili. ⁷ Ukufuma mu luko lwa Simiyoni balimo ifikwi kumi ni fibili, ukufuma muluko lwa Levi balimo ifikwi kumi ni fibili. ⁸ Ukufuma mu luko lwa Zebuloni bakaba ifikwi kumi ni fibili. Ukufuma mu luko lwa Yosefe bakaba ifikwi kumi ni fibili, ukufuma mu luko lwa Benjamini bakaba ifikwi kumi ni fibili. ⁹ Panyuma pache ngaketa ichilundilo ichabandu cho ukuti mundu atangabelenga ukufuma kumaluko ghosi, imitundu yose, ninjughilo shosi. Bimilile pandashi pachisumbe na pamaso pa mwana wa ng'oshi, bafwele iminjilila myelu sona bakakola mani munyobe syabo it's milasa. ¹⁰ Bakitisya nalisyu likulu batile, "Ubupoke ukufuma kwa Chala witu yo akwikala pachisumbe nukwa mwana wa ng'oshi." ¹¹ Bandumi bosa bamilili ukushungulila ichisumbe chila na basongo na fyabumi folo fila, po bawile pasi, bakafughama pandashi pachisumbe po bakalambila uChala. ¹² Bakati, "Ameni, Ubulumbililo, ulughano, amahala, ukutama, ulughindiko, amasasa, amaka fine kwa Chala bwitu bwila bwila ngani, Ameni". ¹³ Po yumo wa basongo bala akalalusya ukuti, "Bo bani bo bafwele iminjilila yelu, sona bafumite kughu?." ¹⁴ Ngamula ukuti, "Songo mumenye mwemwe." Po akambula ukuti bo babo bafumite mundamyo ikulu yila po uou basukutwile iminjilila yabo mwibanda lyamwana wa ng'oshi. ¹⁵ Cho ichifukwa bali pandashi pachisumbi icha Chala bakumubombela paushiku napamushi munyumba yache. Po yo akwikala pa chisumbe akwisa pakubafukatila. ¹⁶ Manye tibakafwe sona ni isala napo kupulika ukuti bomilwe. Te bakapulike sona kowocha kwa isuba nu bufukusi bwake. ¹⁷ Pakuti umwana wa ng'oshi yo ali pachisumbe, we tise abe mutimi wabo, sona tiakabalongoshele ko kuli amisi ghabumi gho ghatakumala lumo. UChala tiise abatisye amashoshi ghabo.".