¹ Ku wandumi wa chalichi cha Efeso usimbe; Agha gho mashu ghake yuyo akola inyenyesi ishingonde ni shibili kunyobe yake iyabulyelo, sona akendagha mukasi mwa fyakubikapo nyali sya golidi ifingonde ni fibili. ² Menye mbombo syako, kibombelesya kwako, nukufikapo kwako kwakwikola. Menye pakuti utakamanya pakwikolelapa pa bandu babibi, sona nukuti bo bakwiyitisya ukuti wo bakutumiwa, lole kuti bobabo bakaghela bakaketa ukuti bamyasi. ³ Menye pakuti bakufwilipo pa ndamyo, nukwikola sona nu kwima mu ndamyo pachifukwa cha ngamu yangu, po batakufoka lumo. ⁴ Lole cho ngubabusya cho ichi, utakungana une nga momwo ukanganagha pabwandilo. ⁵ Utakibwe ukuti wali pamwanya ngani lole uwile, sona unyokele mundumbula yako po ubombe findu fyo ukabombagha pa bwandilo. Pala utakanyokele po itise kwako nukughalusyapo chakubikila nyali pamalo yache ⁶ Lole akandu kamo kene abanikolayi yo nune ndakuyilonda. ⁷ Yo ali namakutu, apulike cho umbepo akuyugha Ku machalichi. Kwa yo akubomba fyisa, tingamupe umwabi wakulya ifipambi fya chikomo cho chikupa ubumi, cho chilimo mu paladayiso lya Chala. ⁸ Ku Bandumi pa Simulina usimbe agha gho mashu ya gho uwakwanda nu wabumalilo, yo afwile sona akanyokela sona Ku bumi. ⁹ Menye ndamyo syangu nu bupina wako lole wuli mukabi. Menye findu fibibi fyo bakuyughila abandu babo bakwiyitisya ukuti bo bayuda, lole te baYuda, sona bamipingo ya Setano. ¹⁰ Menye mopaghe indamyo syo sili papipi ukuba. Lole pulika Setano ali papipi kwingisha pa umwe mu njela, mwakuti muye mugheliwe po timukabe mundamyo amashiku kumi. Sona ube wakukima mpaka nukubufwe, une tingupe imbumbu yabumi. ¹¹ Yo ali namakutu leka apulike cho wambepo akuyugha Ku mipingo. Yo ali na maka takipweteke nu bufwe wa bubili. ¹² Ku wandumi wa mupingo awa Pelegamo usimbe; agha gho mashu gha yo ali nulupanga lo lupyangiwe kosa kosa. ¹³ Po menye ko ukwikala, kokuko ukuli mupando wa Setano. Uwe ngusubalile kwangu utakatagha ulwitiko lwako mw une, nanga po kabalilo ka Antipasi, ukaboni bwangu wa lughano yo amughoghite umukasi mwinyu ko Setano akwikala. ¹⁴ Lole ndinafyo ifindu finandi fyo ndakupulika nafyo fyo fyakuti abandu bangi balimo mukasi mwiyu bo bakukonga ifimanyilo fya Balamu, yo akubikila uBalaki ifya kubina muba isilayeli ukuti baye balye ifyakulya fyo fikupelekiwa ukufifwanikisho, sona nukubomba ububibi. ¹⁵ Po nawe uwe uli nabandu abangi bakusunga ifimanyisyo ifyabo Nikolayi. ¹⁶ Po ghalamuka, sona po utakabombe, po tinise kwako panopano tinise ukulwa nawe nulupanga lwo lukafuma mukanwa mwangu. ¹⁷ Yo ali namakutu, leka apulike fyo uwambepo akuyugha Ku mipingo yo akukinda fyifyifyo tingamupe ilibwe lyelu ningamu yipya yakusimbiwa pabwe. Ingamu yiyo patali numundu yo akiyimeny, loli mwene yuyo akupokelela ibwe lilyo. ¹⁸ Ku Wandumi wa Ku mupingo wakuTiyatila usimbe; Agha gho mashu gha mwana wa Chala, yo meso ghache ghali nga kumwekuka ukwamulilo, po ifilundi fyake fili fyelu nga mo kumwekuka ukwa chisulo. ¹⁹ Menye imbombo syako, lughano lwako, lwitiko lwako, nububombelesho wako, nukwikola kwako. Menye ukuti kubomba mbombo kukinda na pa bwandilo. ²⁰ Lole ngukulinganya ichi, ukwitikisya umukolo yula uYezebele, yuyo akwiyugha ukuti yo musololi mukolo. Yuyo akumanyisya nukubakisha ababombi bangu, ukuti babombange imbibi nukulya ifyakulya fyakupelekiwaukufifwani. ²¹ Ngumupa akabalilo mukolo yula ukuti akanyokeko kububibi bwake. ²² Sona akana kunyaka, timponye mu mubine, lole akana pakunyokako ku ku bumalaya bwake. ²³ Tingagoghe abana bake bo imipingo yose yabandu ba Chala tikamanye ukuti nene ngusala iminogono yamyoyo yabandu mundu wesi ngumupa injombe ukufana no mbombo yo akubomba mwene. ²⁴ Lole nguyugha sona nunumwe mwe mwasyalako muTiyatila, umwe mwesa mwe mutakukonga ichimanyisyo chibibi ichi, so mutakumanyila ifindu fyo abangi bakuti, ifyakufisibwa fikulu fya Setano. Ukuti manye tingabikepo akandu kangi kakung'wama pabo. ²⁵ Lole kolesya cho muli nacho mpaka nose. ²⁶ Yose yo akukinda nukubukilila kubomba cho ngulonda ukufika Ku bumalilo timupe amaka pa bandu ba luko losi. ²⁷ Yuyo tiakalamulile imitundu ni ndodo iya chisulo, nukuyipwasula tunandi tunandi ngati mwo ichibiya cha lifu, mo ngapokela amaka kwa tata. ²⁸ Po tingabape ndanda yo nyenyeshi pa ndabi. ²⁹ Yo ali na makutu, leka apulike cho uwandumi akuyugha kumipingo.