¹ Vano ddinniweya wi vookhalla oraruwa variyari vanyu. Oraruwa wen tti wawi naari athu ohimullapella Mulluku Kheneera. Koolleelliwa wi muthu annakona ni mwaara a Attiitthinnya! ² Nave nyuwaano munakotella tini? Mwaphwanenlle m'moriweke etakarakha nave muthu oyo enre ello yeella anaphwanella wi avenyihiwe variyari vanyu. ³ Koma naari kirekamellane ni nyuwaano m'mwiillini, kinnuganizerani. Koomweeluza khalle muthu aweera ello yeella wonanko kiri wenko, mu nnddina na Apwiihu Yesu*. ⁴ Mwaatthukumanaka vamodda kinaakhalleke vaavo m'munepani nave masiva a Apwiihu Yesu enaakhalleke vaavo. ⁵ Vano munamuvelleelle muthu yoolla wa Satana wi mitteko ddaye ddoochimwa ddoonongiwe, vawi ddiidda Munepaaye oneerovullusiwa va nllapo na Apwiya*. ⁶ Kheyaphaama wi nyuwaano mwiitukhulleke! Ethiyo khamunadduwella wi, " Yisiti* ooyeva annamufufumiha buledi muttheene" ⁷ Munaphwanella muvenyihevo machimo ayo eri wonanko yisiti akhalle wi mukhalle aweella wonanko buledi anaanweene ohikhalla ni yisiti. Muri aweella vawi Khrisitu*, Mwaanakhosa a Paska aaheraattwiwa mukutho. ⁸ Hankoni vano nihakallalle ni Paskaahu oohikhalla ni yisiti akhalle, yisiti a ddoonanara nave a machimo koma ni buledi oohikhalla ni yisiti, buledi a yaweella ni a yawoona. ⁹ Mu kalata oyo kaamulembillemi, kahuullellani wi muhaattaneke ni athu aweera ddooraruwa. ¹⁰ Vano nginaaka wi mwaathawe athu a ellapo yavatthi, ooraruwa apaalle a nrima apaalle awiiya apaalle oollapella mafano. Kaambiiwa wi mwaathawe athu yaalla munaphwanella wi mukhumemo mu ellapo yavattheella. ¹¹ Eyo kaakeemi tti yawi munaphwanella wi muhaattane ni muthu oyo aniiromolla yeekha wi tti oomukhulupilila Mulluku koma ooraruwa apaalle a nrima apaalle oollapella mafano apaalle olalata apaalle oolezela apaalle awiiya. Muhicheke vamodda ni muthu awi ddiidda. ¹² Kohiyo muttekwaaka oweeluza athu a otte wa mpingo*. Mulluku aneeroweeluza. ¹³ Koma ethiyo khamunaphwanella oweeluza athu a mumpingoni mwanyu? Mawu a Mulluku* enallota wi, " Mumuvenyihemo muthu oonanara mumpingoni mwanyu."