¹ Vano athu enaphwanella eneereke hiyaano oorumeyella a Khrisitu* oopwatha ddookhuweya ddoovenyera wa Mulluku. ² Ello emodda yoopaalleya tti yawi oorumeyella yaalla ekhalle oororomelleya. ³ Vano miyaano nginnana mutteko ddawi kineeluziwe ni nyuwaano apaalle vanthatoni na athu, naari nginaddeluza meekha. ⁴ Vawi nginoona ello yookivaanyiha m'murimani mwaka, koma yeella khenasimikizera wi miyaano tti oolungama. Apwiya* sika enakeeluza miyaano. ⁵ Sika muhimweeluze arive muthu enthawi yoophwanella ehinakwankhwane, owa wa Apwiya. Eneroowooniha ddawiipittheya dda mwiipiphini nave aneerewuupullulla maganizo a athu. Nave attheene aneerowaakhella ntitimiho naye na wa Mulluku. ⁶ Asinnaka ni arokoraka, killotilleeminndda tti dda miyaano ni Apolo* wi nikhalle echisanzwaanyu, wi dduuhuddiheni ottaphullella mawu awi, " muthwareke nnddo ddalembiwe." Vano muhiitukhulleke mwa muthu mmodda ni omuvevulla mmodda. ⁷ Ttaani aweerilleni nyuwaano uullupalli a athu amodda? Kahiyo Mulluku uuvahilleni erive ello muriinyuna? Vano muniitukhullella tini, wonanko eyo muriinyuna khe emphaso? ⁸ Ethiyo mookhallana khalle erive ello munapaalleenyu? Ethiyo vano muri a eyuuma? Ethiyo mookhalla mamwene vano, naari hiyaano nihinakhallevo? Ddaawerokhalla phaama mwaakhanlleke mamwene wi hiyaanottho nikhalle mamwene ni nyuwaano. ⁹ Vano kinnona wi Mulluku oovaha nipuro noovevuwa wa hiyaano amurummwa*, wonanko athu elamuliwe wi yiiphiwe wonanko ello yawoonihiwa wa ellapo ettheene yavatthi wa angelo ni wa athu. ¹⁰ Hiyaano tti ookarangeya ekaamba ya Khrisitu, koma nyuwaano tti a ezeru mwa Khrisitu! Hiyaano tti oofooka koma nyuwaano tti amasiva! Nyuwaano munnavahiwa olemu koma hiyaano ninnavevulliwa! ¹¹ Ophiyera enthawi yeella hiyaano ninnavolliwa ettalla ni nthona, ninnawara matapwata, ninnukuthiwa nave khaninna vookhalla vawihuvawihu. ¹² Ninnaphara mutteko ni mattaahu. Naatembeleliwaka, ninnadalisa. Naahoosiwaka, ninnvillella. ¹³ Naawoottheriwaka, ninnaakhulla ni mawu aphaama. Niri wonanko ddootathilliwa vaddallani dda ellapo yavatthi nave ophiyera ollello niri ddoonyaambusiwa! ¹⁴ Kinalembella ella wa nyuwaano ohiri kaambiiwa kuuwulliheni muru koma wi kuuhuddiheni wonanko muri anaaka ookondiwa. ¹⁵ Vawi naari murina Ahuddihi 10,000 mu okumaanyu wa echikhulupililo, murina Attiitthiinyu voowaana othenga waphaama wa nyuwaano. ¹⁶ Vano kinimuuvekani wi mukittakihere miyaano. ¹⁷ Sika ekaambiiwa kinamurumiheemi Timoteo* wa nyuwaano, oyo ari mwanaka ookondiwa ni oororomelleya mu eyaattano ni Apwiya. Aneerowuupusani ettilla kinathwareemi mwa Khrisitu Yesu. Nndda sika kinahuddiheemi virive veko mu mipingo ddittheddene. ¹⁸ Amoddanyu munnakota kaambiiwa muneesa wi ngiwaawo owaninyu. ¹⁹ Koma Apwiya yapaalla kineerowa wa nyuwaano veneva nave kineerowoona meekha masiva ayo athu ookotaalla eriiwana, ohiri nnddo onallotiiwa. ²⁰ Vawi omwene wa Mulluku khe wa mawuve koma tti wa masiva. ²¹ Munapaalla tini? Kiwe wa nyuwaano ni ekopo yawuuwashullanani apaalle ni murima wa echikondi ni woomaalleya?