¹ Vano, Asinnaka ni arokoraka kinnaaka mudduwelle ddawoona dda emphaso ddoovenyera wa Munepa Waweella nnddo mwaalembilleenyu. ² Munnuupuwella wi mwaariinyu athu oohimullapella Mulluku, mwaahollosiwa mu ettilla ddoohiyanahiyana ollapella mafano ddoohikhalla ni okumi. ³ Kinnapaalla mudduwelle wi khaavo oyo anahoollelliwa ni Munepa wa Mulluku anawora ollota wi, "Yesu* tti ootembeleliwa!" Nave khaavo oyo anawora ollota wi, " Yesu tti Apwiya*", ahihoollelliwe ni Munepa Waweella. ⁴ Vookhalla emphaso ddoohiyanahiyana ddoovenyera wa Munepa koma Munepa mmoddamoddave yooyo sika anavaha. ⁵ Vookhalla ettilla ddoohiyanahiyana ddoorumeyella koma anarumeyelliwa tti Apwiya mmoddamoddave yooyo. ⁶ Vookhalla masiva oopharella mutteko oohiyanahiyana koma anavaha masiva yaayo wa attheene va orive mutteko tti Mulluku mmoddamoddave yooyo. ⁷ Arive muthu oovahiwa emphaso ddoovenyera wa Munepa wi attheene epindulena. ⁸ Munepa anamvaha muthu mmodda othenga wa ezeru nave Munepa mmoddamoddave yooyo anamuvaha muthu mmodda othenga woodduwelliha. ⁹ Munepa mmoddamoddave yooyo anavaha echikhulupililo wa muthu mmodda nave wa muthu mmodda anamvaha masiva oochiliha. ¹⁰ Munepooyo annamuvaha muthu mmodda masiva aweerana ddoottikhiniha, wa mmodda emphaso yoollotella, wa mmodda ezeru ddoohiyaniha emphaso ddoovenyera wa Munepa ni nnddo ddihinavenyera wa Munepa. Wa muthu mmodda anamvaha masiva ollota ellotello ddoohidduwanyeya*; nave wa mmodda anamvaha masiva ottaphullella ellotellonnddo. ¹¹ Nave tti Munepa mmoddave yooyo aneera ddittheddenenndda. Annavaha emphaso yoohiyanahiyana wa arive muthu mmo anapaallelleeye. ¹² Khrisitu* ari wonanko mwiilli mmodda, wookhalla ni eziwalo ddinchichi ddoohiyanahiyana. Naari woopiwe ni eziwalo ddinchichi onakhalla mwiilli mmodda. ¹³ Emoddamoddave yeeyo, hiyaano attheene, naari niri Ayuda apaalle athu ayo ehiri Ayuda, naari niri akaporo apaalle nihiri akaporo, noobatiziwa ni Munepa mmodda okhalla mwiilli mmodda nave noovahiwa Munepa mmoddamoddave yooyo. ¹⁴ Vawi mwiilli khawoopiwe ni echiwalo emodda koma ni eziwalo ddinchichi. ¹⁵ Nnyallo ollota wi, " Kaambiiwa miyaano ngihiyo nnatta,ngiri echiwalo ya mwiilli." Koma yeeyo tti yooheeriha wi nnyallo nihikhalle echiwalo ya mwiilli. ¹⁶ Nave naaru nallota wi, "Kaambiiwa miyaano khe niittho, ngiri echiwalo ya mwiilli." Koma yeeyo tti oheeriha wi naaru nihikhalle echwalo ya mwiilli. ¹⁷ Mwiilli muttheene waariki niitho, waawiiweke mwawiidde? Nave waariki naaruve, wawiimuryeke mwawiidde? ¹⁸ Koma mmo ddikhallelliiwa, Mulluku ahiyaatthi erive echiwalo m'mwiillini moollikana ni mmo apaallelleeye wi ekhalle. ¹⁹ Mwiilli khawaakhallevo yaariki echiwalo emoddave! ²⁰ Koma ddikhallelliiwa mmo, vookhalla eziwalo ddinchichi koma mwiilli mmoddave. ²¹ Sika vano niittho khaniwora ollota ni nnatta wi, "Nginuupaalla weyaano!" Naari muru khowora ollota wa manyallo wi, "Nginuupaalla weyaano!" ²² Koma ddawoona ddene tti ddawi eziwalo nnddo ddineeriwa ddoofooka sika ddiri ddoopaalleya wunchichi. ²³ Nave eziwalo ddineesiwa ddoohiphwanella ovahiwa olemu, tti nnddo ddinapwathiwa wunchichi nave eziwalo ddoohoonihiwa wa athu, ddinawarihiwa phaama. ²⁴ Koma eziwalo ddimoddannddo khaddinapwathiwa mwawiddiiddo. Mulluku aallundellella eziwalo ddittheddene vamodda avaha olemu wawaata wa eziwalo ddihinavahiwa olemu. ²⁵ Sika vihikhalle okawaneya m'mwiillini koma eziwalo ddittheddene ddiphwanaphwaneke moopwathana emodda ni ekhwaaye. ²⁶ Echiwalo ya mwiilli emodda yoona ovoreya, eziwalo ddittheddene ddinniwana ovoreya. Echiwalo emodda yavahiwa olemu, eziwalo ddittheddene ddinnahakallallana. ²⁷ Attheenenyu tti mwiilli wa Khrisitu nave arive muthu tti echiwalo ya mwiillooyo. ²⁸ Mumpingoni, Mulluku auaatthoolla vawaamba amurummwa*, a neepiilli anamallotella*, aneeraru Ahuddihi, oothwarellella, athu aweera ddoottikhiniha, oothwarellellattho, athu oovavahiwa masiva oochiliha apaalle okavihera amodda apaalle waahoollella apaalle ollota ellotello ddoohidduwanyeya. ²⁹ Ethiyo attheenaayo tti amurummwa, apaalle anamallotella, apaalle Ahuddihi? Ethiyo arive muthu ookhallana masiva aweera ddoottikhiniha? ³⁰ Ethiyo arive muthu tti oochiliha, apaalle oollota ellotello ddoohidduwanyeya, apaalle ottaphullella ddinallotiwannddo? ³¹ Nave nyuwaano murimaanyu okhalle va emphaso dduullupalli. Vano kineerowoonihani ettilla yaphaama yookhwaranya erive ello.