¹ Ngalaka' iko' mile' malaikat disah umpatn' surga, minsakng kunci jurang maut ge' nyabuah rante ahyok' ka bareknga'. ² Ini' naap naga dakoh, sa nipa ama' , diu' ta sitan ge' balis, ge' ningoa' salama saribu taun, ³ Nyakahatna' ka sadatn' jurang maut, nutupa, ge' nyigela' sapaya ini' kati' ao' nyasat bangsa-bangsa agi, sampe saribu taun dakoh' pangkabas. Laka dakoh' , ini' ao' gatn' ngarapas yak samantara. ⁴ Lalu, iko' mile' takhta-takhta ge' ka samoa' unyung ayo sok da gatn mangkatn' kuasa yak manghakimi. Iko' mile' jiwa ayo-sok da gatn' nyantak abaka' karena kasaksian Yesus ge' karena firman Jabata, ge' ayoa' da kati' nyambah banatang dakoh' ato patunga' ge' kati' nyamut tande banatang dakoh' wa kaning ato barekng ayoa. Ayoa' ure' idup ge' marintah samahu Kristus salama saribu taun. ⁵ Aoa' ta, ayo-sok kabis da laitna' kati' idup agi katinga masa pangkabas saribu taun dakoh' diah' ta pangkidup da pamule'. ⁶ Gatn mabarakat ge' kuduslah ayo-sok da kaatn' bagian sadatn pangumpat pamule' dakoh'. taradap ayo- sok diah', ka kabis da kadua kati' bakuasa, tapi ayoa' ao' jadi imam-imam Jabata ge' Kristus, ge' ao' marintah samahu Ini' salama saribu taun. Kakalahan Balis ⁷ Ngalaka masa saribu taun ngaabas, Balis ao' gatn ngarapas umpatn' panjaraa'. ⁸ Ini' ao' anu yak nyasat bangsa-bangsa ka ampat panjuru bumi, Gog ge' Magog, ge' ngubu ayoa' yak baparang. Itongan ayoa' ulah pasir ka laut. ⁹ Ayoa' maka' ka dampar bumi ge' ngalipong dio ayo sok Kudus ge' kota da terkasih. Namun, api disah umpatn rangit ge' mangkabok ayoa'. ¹⁰ Lalu, sitan laka nyasat ayoa' gatn nyakahatn ka sadatn lautan api ge' belerang, ka teetn' lah binatang ge' nabi palsu dakoh' uga gatn' nyakahatn. Ayoa' ao' gatn' nyiksa tano' ge' ngarum salama-lamaa. penghakiman ka Hadapan Takhta Ranakng ¹¹ Ngalaka dakoh, iko' mile' takhta ranakng da ahyo' ge' Ini' da munyung ka samoa', da umpatn' hadapanA' bumi ge' rangit anyap ge' kati' gatn amput' agi tampat yak ayoa'. ¹² Ge', iko' mile' ayo -sok kabis, ahyo' ge' inek,agutn ka hadapan takhta dakoh. Lalu, gatn' muka' Kitab-Kitab ge' nyabuah Kitab da laitn, dakoh ta Kitab kahidupan, ge' ayo-sok kabis dakoh gatn' mahakimi badasar jai da tatulis kasadatn' Kitab-Kitab dakoh, sasuai parbuatan ayoa'. ¹³ Laut nyarah ayo-sok kabis da ani ka sadatna', maut ge'Hades uga nyarah ayo-sok kabis da ani ka sadatna' ge' ayoa' gatn' mahakimi, masing-masing manurut parabuatana.' ¹⁴ Lalu, maut ge' Hades gatn' nyakahatn ka sadatn' lautan api. Diah ta kabis da kadua-- lautan api. ¹⁵ Sa' ngina nyungan sok gaatna' kati' tatulis kasadatn' Kitab Kahidupan, ini' ao' gatn' nyakahatn ka sadatn' lautan api dakoh.