¹ Iko' mile' tande laitn ka rangit, da ahyo ge' ajaib, ijo' malaikat da mingsakng ijo' bancana, da pangkabis, karna kasadatn kaijo' bancana dakohlah murka Jabata gatn mangkabas. ² Lalu, iko' mile' tarut' ulah lautan kaca bacampur api ge' ayoa' da laka ngalah binatang dakoh, patunga', da numor gaatna', agutn ka tabik' lautan kaca dakoh nige nyinte kecapi Jabata. ³ Ayoa' ngado ada Musa, hamba Jabata, ge' ngado Anak Domba: "Ahyo ge' ajaib samaan karaje-Mu' ai Tuhan, Jabata Da Mahakuasa. Adil ge' banar samaan pagala-Mu' ai Raja sagala bangsa. ⁴ Asi ta da kati' buut' wa-Imu', ai Tuhan da kati' memuliakan gaatn-Mu'? Sabab, duhut Akupm lah da Kudus. Samaan bangsa ao' utukng ge' manyambah ka hadapan-Mu' karna keadilan-Mu' nga gatn nyata." ⁵ Ngalaka samaan hal diah, iko' mile' Bait Jabata, Dio kesaksian Jabata, tatukas. ⁶ Ijo' malaikat da minsakng ijo' bancana dakoh mungkas umpatn Bait Jabata, bapangiak linan da ranakng ge' bakilo, ge' ngiak selempang barawat ka sado' ayoa'. ⁷ Nyungan umpatn kaampat makhluk mangkat wa kaijo' malaikat dakoh ijo' cawan barawat, pahnu murka Jabata, da idup sampe salama-iamaa' ⁸ Bait Jabata gatn ngapahnu nige' asup umpatn kemuliaan Jabata ge' umpatn kuasa-A; de' ti nyungan sok pun bisa maruh Bait Jabata katinga ijo' bencana umpatn kaijo' malaikat dakoh pangkabas.